राजविराज । राजविराज नगरपालिकामा देखिएको विवाद सोमबार समेत समाधान हुन सकेन् ।
जिल्ला प्रशासन कार्यालयमा सोमबार दिनभर नगरपालिकामा देखिएको विवाद समाधान गर्न बैठक बसेको थियो । नगरपालिकाका निलम्बित मेयर भीमराज यादवले श्रवण साह तथा कावा मेयर इसरत परबिनले भोगेन्द्र यादवबाट काम गराउने अडान बैठकको शुरुवातमा लिइरहँदा यो दुबैलाई छाडी अर्काेलाई ल्याइनेमा लगभग सहमति भएपनि निष्कर्षमा पुग्न सकेन् ।
बैठक चलिरहँदा यादवले श्रवण साहलाई नमाने भोगेन्द्रलाई पनि नमान्ने बरु अर्काेलाई बोलाउँदा मान्य हुने प्रस्ताव राखेका थिए ।
पछि कावा मेयर परबिनले पनि यसमा सहमति रहेको भन्दै तत्काल ताला खोल्नुपर्ने बताएकी थिइन । तर यादवले कार्यपालिकाको बैठकबाट भोगेन्द्रलाई फिर्ता गरी अन्यलाई बोलाउने निर्णय नगरेसम्म ताला नखोल्ने अडान लिएपछि तत्काल सहमति हुन सकेन ।
प्रमुख जिल्ला अधिकारी भोला दाहालले नगरपालिकामा देखिएको समस्या समाधान गर्ने उद्देश्यले बैठकको आयोजना गरेपनि दुई पक्षको अडानको कारण निष्कर्षमा पुग्न नसकेको बताए ।
नगरपालिकामा देखिएका समस्यालाई जिल्ला प्रशासन कार्यालयबाट सक्नेजति समाधान गर्ने, प्रमुख प्रशासकीय अधिकृतको विषयमा संघीय मामिला तथा सामान्य प्रशासन मन्त्रालयसँग अनुरोध गर्ने र तत्काल ताला खोलेर सेवाग्राहीलाई सेवा दिने विषयमा आफूले आग्रह गरेपनि यादव पक्षले तत्काल निर्णय नगरेसम्म नमान्ने बताएको दाहालले बताए ।
यादवले मंगलबार बिहान परबिनले कार्यपालिका बैठक बोलाउने बताएकाले सोही बैठकले अर्काे प्रमुख प्रशासकीय अधिकृतलाई ल्याउने निर्णय गरेपछि समस्याको समाधान हुने बताए ।
परबिनले सेवाग्राहीको काम रोक्न नमिल्ने भन्दै तत्काल ताला खोलेर बिहानै बैठक बस्न आग्रह गरेपनि नमानेको बताइन् ।
प्रमुख प्रशासकीय अधिकृत श्रवण साहले काम नगरेको भन्दै कावा मेयर परबिनले शिक्षा शाखा प्रमुख भोगेन्द्र यादवलाई आर्थिक र प्रशासनिक काम गराउने भन्दै मन्त्रालयबाट निमित्त प्रमुख प्रशासकीय अधिकृत बनाएर ल्याएकी छन् ।
यो जानकारी पाए लगतै यादवले आइतबार राजविराजमा प्रदर्शन गर्दै नगरपालिकाको कार्यालयमा ताला लगाएका छन् । ताला लगाएर रिले अनसन शुरु गरेपछि सेवाग्राही मर्कामा परेका छन् ।
