राजविराज । राजविराज नगरपालिकास्थित गजेन्द्रनारायण सिंह अस्पतालमा तोडफोड गरेको आरोपमा चार जना पक्राउ परेका छन् ।
पक्राउ पर्नेमा राजविराज नगरपालिका वडा नम्बर ४ बस्ने २४ बर्षीय उदय ठाकुर, सोही ठाउँका २४ बर्षीय बिनित चौहान, बिष्णुपुर गाउँपालिका वडा नम्बर ६ बस्ने ५० बर्षीय प्रमेश्वर यादव र सोही ठाउँका २५ बर्षीय रमन यादव छन् ।
आईतबार राति अस्पतालमा तोडफोड गरेको आरोपमा उनलाई पक्राउ गरिएको सप्तरी प्रहरीका प्रबक्ता एवं डीएसपी डम्बरबहादुर पुरीले जानकारी दिए ।
पक्राउ परेकाबिरुद्ध अपराधिक उपद्रब गरेको कसुरमा सप्तरी जिल्ला अदालतबाट ६ दिनको म्याद लिई अन्य अनुसन्धान गरिरहेको पुरीले बताए ।
आईतबार राति अस्पातलको एनआइसियू कक्षधको बल्ब एक नवजात शिशु राखेको म्याटमा एक्कासी झरेपछि ती नवजात शिशु घाइते भएका थिए । घाइते नवजात शिशुलाई तत्कालै थप उपचारका लागि विराटनगर लगिएको थियो । बालकको अवस्था हाल सामान्य रहेको प्रहरीको भनाई छ ।
यो घट्नापछि शिशुका आफन्त तथा अन्य व्यक्तिहरु जम्मा भएर अस्पतालमा होहल्ला गर्दै चिकित्सकलाई समेत गालीगलौज र हातपात गरेका थिए । अस्पतालमा तोडफोड र आगजनी समेत गरेपछि उनीहरुलाई पक्राउ गरिएको प्रहरीको भनाई छ ।
