राजविराज । समयावधी नै नपुगी कर्मचारीको सरुवा तथा काजमा पठाइने कार्य बन्द गर्न माग गर्दै मधेश प्रदेशका मुख्य सचिवलाई ज्ञापन पत्र पठाइएको छ ।
सप्तरीका युवाहरुले प्रमुख जिल्ला अधिकारी टुवराज पोखरेल मार्फत् बिहीबार प्रदेशकबा मुख्य सचिवलाई ज्ञापन पठाएका हुन् । ज्ञापनमा सम्बन्धित कर्मचारीलाई आफ्नो कार्यकाल पूरा गर्न आवश्यक वातावरण सुनिश्चित गर्न माग गरिएको छ ।
मधेश प्रदेश अन्तर्गतका विभिन्न विकासीय कार्यालयहरु कृषि ज्ञान केन्द्र, भेटेनरी अस्पताल, भौतिक पूर्वाधार, सिंचाई, ािमाजिक विकास जस्ता कार्यालयका प्रमुखलाई तोकिएको समयावधी पूरा नहुँदै बीचमै काजमा सरुवा गर्ने कार्यप्रति गम्भीर ध्यानाकर्षण भएको जनाउँदै ज्ञापनमा भनिएको छ, ‘केही विचौलियाहरुको प्रभावमा परी अनावश्यक रुपमा रकम असुल गर्ने जस्ता गम्भीर अनियमित कृयाकलापहरु भइरहेको छ ।’
यस्तो प्रबृत्तिले कर्मचारीको मनोबल घटाउने, काम गर्ने वातावरण बिगार्ने र विकास निर्माणका कामहरुमा ढिलासुस्ती, अपारदर्शिता र भ्रष्टाचारलाई प्रोत्साहन गर्ने अवस्था देखिएको ज्ञापनमा उल्लेख गरिएको छ । ‘एउटै कार्यालयमा कार्यरत कार्यालय प्रमुख हुँदाहुँदै पुनः अर्को कर्मचारीलाई काजमा खटाउने तथा त्यस प्रकृयामा आर्थिक लेनदेन हुने प्रवृत्ति चिन्ताजनक छ’ ज्ञापनमा भनिएको छ, ‘यस्ता कार्यहरु रोक्नु आवश्यक छ ।’
