राजविराज । सप्तरी सदरमुकाम राजविराज नगरपालिका वडा नम्बर २ स्थित गुलाब ग्यारेज अगाडीको सार्वजनिक जग्गा कुनै पनि धर्मावलम्बीले प्रयोग नगर्ने निर्णय यथावत राखिने भएको छ ।
जिल्ला प्रशासन कार्यालयमा शुक्रबार बसेको सर्वपक्षीय, सर्वदलीय बैठकले यस्तो निर्णय गरेको हो ।
२१ असोज २०८२ मा जिल्ला प्रशासन कार्यालयमै बसेको सर्वदलीय, सर्वपक्षीय बैठकले गुलाब ग्यारेज अगाडीको सार्वजनिक जग्गा कुनै पनि धर्माबलम्बीले प्रयोग नगर्ने निर्णय भएको थियो ।
उक्त स्थानमा निर्माणाधीन अवस्थामा रहेका ठोस संरचना राजविराज नगरपालिकाले हटाउने तथा उक्त स्थानमा राखेका सवारी साधन लगायत अन्य सबै प्रकारका सरसामानहरु व्यक्तिको भए व्यक्ति स्वयमले हटाउने र सामाजिक सद्भाव तथा एकताको वातावरणलाई कायम राख्दै उक्त स्थानमा मनाउन लागेको लक्ष्मी पुजा समेत अन्यत्र ठाउँमा सारी मनाउने तत् पश्चात कुनै पनि किसिमको धर्म सम्प्रदायका नागरिकहरुले आफ्नो धर्म सम्प्रदायसँग सम्बन्धित जग्गा रहेको हो भनि आफ्नो हक अधिकार प्रयोग नगर्ने निर्णय त्यसबेला भएको थियो ।
उक्त स्थानमा कुनै पनि धर्म सम्प्रदायसँग झल्किने खालको झण्डा नराख्ने र राखेको भए सोही समुदायका व्यक्तिहरु आ–आफ्नो झण्ड तत्कालै हटाउने निर्णय समेत उक्त मितिमा भएको थियो ।
शुक्रबार भएको बैठकले सोही निर्णयलाई निरन्तरता दिने निर्णय गरेको प्रमुख जिल्ला अधिकारी श्यामकृष्ण थापाले जानकारी दिए ।
उनका अनुसार उक्त निर्णय पूर्ण रुपमा कार्यान्वयन गरिनेछ ।
बैठकले इस्लाम धर्मावलम्बीहरुको चाडपर्व मोहरम (दाहा) को अवसरमा राजबिराज नगरपालिका लगायत सप्तरी जिल्लाका विभिन्न स्थानहरुमा हुने कार्यक्रमहरुमा हातहतियारको प्रदर्शन, अवाञ्छित गतिविधी जस्ता क्रियाकलाप नगरी शान्तिपूर्ण, व्यवस्थित र सभ्य ढंगले मनाउन सबै धार्मिक समुदाय, राजनीतिक दल, स्थानीय प्रशासन, सुरक्षा निकाय, संघ संस्था, मिडिया लगायत सरोकारवालाहरुले आफ्नो तर्फबाट प्रभावकारी भूमिका निर्वाह गर्ने निर्णय गरेको छ ।
