मधेश सम्वाददाता
राजविराज, २७ असोज ।
भारतमा मृत अवस्थामा फेला परेका सशस्त्र प्रहरीका असईको हत्या भएको खुलेको छ । हत्या आरोपमा सशस्त्र प्रहरीकै एक जना जवान पक्राउ परेका छन् ।
सशस्त्र प्रहरी बल गण नम्बर ६ हेडक्वार्टर राजविराजमा दरबन्दी भई छिन्नमस्तास्थित बोर्डर आउट पोष्टमा कार्यरत सशस्त्र प्रहरीका असई सत्यनारायण यादवको गत असोज २० गते भारतीय भूमीमा शव फेला परेको थियो । शरीरमा लगाएको कपडा फुकालिएको अवस्थामा भारतको बिहार राज्य अन्तर्गत मधुवनी जिल्लाको जिरोगा पुनर्वासस्थित घोडदह खोलामा उनको शव फेला परेको थियो ।
४५ बर्षीय यादवको हत्या उनकै सहकर्मी प्रहरी जवान होमबहादुर खत्रीले गरेका छन् । प्रहरीले खत्रीलाई नियन्त्रणमा लिएको छ । यद्यपी यसबारेमा औपचारिक जानकारी प्रहरीले गराएको छैन् ।
अनुसन्धानमा खटिएका एक अधिकृतका अनुसार खत्रीलाई नियन्त्रणमा लिएर अन्य अनुसन्धान भइरहेको छ ।
असई यादवलाई प्रहरी जवान खत्रीले मादक पदार्थ सेवन गरी कुटपिट गर्दा उनको मृत्यु भएको उनले बताए । खत्री मादक पदार्थ सेवन गरी ड्यूटिमा ढिलो आउँदा असई यादवले यस्तो किन गरेको भन्दा दुबैबीच बादविवाद भएको र त्यसपछि खत्रीले कुट्दा उनी बेहोस भएका थिए । बेहोस भएपछि खत्रीले बिजुलीको तारले घाँटी कसेर मारेको प्रहरीको अनुसन्धानले देखाएको छ ।
मृत्यु भएपछि खत्रीले केहि व्यक्तिको सहयोगमा शव भारतमा लगेर फ्याँकेका थिए । प्रहरी श्रोतका अनुसार खत्रीले यो कुरा स्वीकारेका छन् ।
खत्री अहिले नेपाल प्रहरीको नियन्त्रणमा छन् भने यहीं घट्नामा अनुसन्धानका निम्ति सशस्त्र प्रहरी गण नम्बर ६ राजविराजका प्रमुख एसपी हेडक्वाटरमा तानिएका छन् । उनको जिम्मेबारी पनि खोसिएको छ ।
