राजविराज । गर्मीको समयमा ४० डिग्रीसम्म तापक्रम बढेको समयमा मधेशका जिल्लामा विद्युत अनियमित भइरहेको भन्दै जनअधिकार पार्टीले नेपाल विद्युत प्राधिकरणको ध्यानाकर्षण गराएको छ ।
पार्टीका अध्यक्ष शरदसिंह यादवले प्राधिकरणको केन्द्रीय कार्यालय काठमाडौंमा ज्ञापन पत्र बुझाउँदै यसमा ध्यान दिन आग्रह गरेका छन् ।
‘मधेशका जिल्लाहरुमा तापक्रम अत्यधिक बढ्दा समेत विद्युत आपूर्तीको अवस्था कहालिलाग्दो छ’ ज्ञापनमा भनिएको छ, ‘यसले बृद्धबृद्धा, बालबालिकासहित सबै पीडित भइरहेका छन् ।’
विद्युत अनियमित हुँदा कर्मचारीले पनि रिस्पोन्स नलिने गरेको गुनासो गर्दै अध्यक्ष यादवले विद्युतको आपूर्ती सहज नहुनु दुःखको कुरा भएको ज्ञापनमा उल्लेख गरेका छन् । ‘विद्युत जाँदा कर्मचारीहरुलाई सर्वसाधारणले फोन गर्दा पनि ध्यान नदिने गरेको पाइएको छ’ ज्ञापनमा भनिएको छ ।
सरकारले गर्मीलाई विपदको रुपमा लिनुपर्ने आवश्यक रहेको समेत उनले बताएका छन् ।
ज्ञापन बुझ्दै प्राधिकरणका कायममुकायम कार्यकारी निर्देशक दिर्घायु कुमार श्रेष्ठले मागप्रति गम्भीर रहेको बताए ।
उनले भोल्टेजका कारण असुविधा भइरहेको जानकारी आफूहरुले पनि पाएको बताउँदै निर्माण भइरहेको १३२ र ३३ केभिएको सव स्टेशनहरु बनिसकेपछि यो समस्या हटेर जाने बताए ।
