राजविराज । सप्तरीको एकै गाउँबाट फरार रहेका १३ जना पक्राउ परेका छन् । अदालतबाट फैसला भई जरिवाना तोकिएपछि फरार भएका उनीहरुलाई प्रहरीले नियन्त्रणमा लिएको हो ।
पक्राउ पर्नेहरु जिल्लाको बलान बिहुल गाउँपालिका वडा नम्बर ५ का हुन् ।
कुटपिट मुद्दामा संजीव कुमार यादव, राजकुमार यादव, रामचन्द्र यादव, विन्देश्वर यादव, भूपनारायण यादव, अशोक कुमार यादव, शिवराम यादव, प्रद्रीप यादव, चन्देश्वर यादव, अजीत कुमार यादव, देवनारायण यादव पक्राउ परेका छन् ।
यी व्यक्तिहरुलाई कुटपिट मुद्दामा सप्तरी जिल्ला अदालतले रु तीन हजार जरिवाना तोकेपछि फरार सूचीमा थिए ।
यहीं ठाउँका मिथुन भनिने चन्द्रकान्त यादव र मुकेश कुमार यादव पनि पक्राउ परेका छन् ।
मिथुनलाई नकवजनी चोरी मुद्दामा सप्तरी जिल्ला अदालतले पाँच हजार र मुकेशलाई सबारी ज्यान मुद्दामा रु दुई हजार जरिवाना तोकिएको थियो ।
कुटपिट मुद्दामा पाँच हजार जरिवाना तोकिएका डाक्नेश्वरी नगरपालिका ३ का आरतीदेवी मुखिया र सुन्दरलाल मुखियालाई पनि पक्राउ गरिएको छ । डाक्नेश्वरी नगरपालिका वडा नम्बर ४ का बिनोद कुमार यादव पनि पक्राउ परेका छन् । कुटपिट मुद्दामा उनलाई अदालतले रु पाँच हजार जरिवाना तोकेको थियो ।
पक्राउ परेकाहरुलाई सप्तरी जिल्ला अदालतमा दाखिला गरिएको सप्तरी प्रहरीका प्रवक्ता एवं डीएसपी हेमराज घिमिरेले जानकारी दिए ।
