![]()
जनकपुरधाम । राष्ट्रिय स्वतन्त्र पार्टी (रास्वपा) का सभापति रवि लामिछाने र मधेश प्रदेश सभापति तपेश्वर यादवबीच पारिवारिक भेटघाटसँगै मधेशमा पार्टी संगठन विस्तार र सुदृढीकरणका विषयमा छलफल भएको छ।
छठ पर्व मनाउन जनकपुरधाम पुगेका सभापति लामिछाने र उनकी पत्नी निकिता पौडेलले मधेश प्रदेश सभापति यादव तथा उनकी पत्नी रोसनी यादवसँग भेटघाट गरेका हुन्।
पारिवारिक वातावरणमा भएको भेटमा मधेश प्रदेशको धार्मिक, सांस्कृतिक तथा सामाजिक विशिष्टता, छठ पर्वको महत्त्व र मधेशको मौलिक पहिचानका विषयमा विचार आदानप्रदान भएको थियो।
त्यसैगरी, मधेश प्रदेशमा रास्वपाको संगठन विस्तार, संगठनात्मक संरचनालाई थप मजबुत बनाउने तथा प्रदेशदेखि स्थानीय तहसम्म पार्टीको उपस्थितिलाई प्रभावकारी बनाउने विषयमा समेत छलफल भएको बताइएको छ।
पर्वको अवसरमा भएको यो भेटघाटले पार्टीका केन्द्रीय र प्रदेश नेतृत्वबीचको आपसी सम्बन्धलाई थप प्रगाढ बनाउनुका साथै मधेशमा संगठन विस्तारप्रति रास्वपाको चासोसमेत उजागर गरेको छ।







