सप्तरी, २६ भदौ । नेकपा माओवादी केन्द्र सप्तरीले आगामी मंसिर ४ मा हुने प्रतिनिधि सभा र प्रदेशसभा सदस्य निर्वाचनका लागि उम्मेदवारको टुँगो लगाएको छ । जिल्ला इन्चार्ज अशोक कुमार मण्डल ‘अमर’ र नेता सुर्यनाथ यादव ‘सुभाष’ प्रतिनिधी र प्रदेश सभामा पनि सिफारिस भएका छन् ।
क्षेत्र नम्वर २ को प्रतिनिधि सभा र प्रदेश सभा २ को (क) बाहेक सबै निर्वाचन क्षेत्रका लागि उम्मेदवारको टुँगो लगाउँदै नाम सिफारिश गरेको हो ।
क्षेत्र नम्बर १ बाट प्रतिनिधि सभा सदस्यको लागि प्रत्यक्षतर्फको निर्वाचनमा अशोक कुमार मण्डल (अमर) र सुर्यनाथ यादव (सुभाष)को नाम सिफारिस गरेको छ भने, प्रदेश सभा सदस्यको लागि प्रत्यक्षतर्फको निर्वाचनमा क्षेत्र नम्वर १ को (क) बाट शम्भु खड्का र सत्य नारायण चौधरीको नाम सिफारिस गरिएको छ । यस्तै क्षेत्र नम्वर १ को (ख) बाट प्रदेश सभा सदस्यको लागि अशोक कुमार मण्डल (अमर) र सुर्यनाथ यादव (सुभाष)को नाम सिफारिस गरिएको छ ।
यस्तै क्षेत्र नम्बर २ (ख) बाट प्रदेश सभा सदस्य निर्वाचनको लागि महेश प्रसाद यादव र उमेश कुमार यादवको नाम सिफारिस गरेको छ । उमेश कुमार यादव २०७० को निर्वाचनमा सप्तरी क्षेत्र नम्वर २ बाट निर्वाचित भई सिचाई मन्त्री समेत भई सकेका व्यक्ति हुन् ।
यसैगरी क्षेत्र नम्बर ३ बाट प्रतिनिधि सभाको निर्वाचनका लागि शेर सिंह र कर्मलाल यादवको नाम सिफारिस गरिएको छ भने, प्रदेश सभा क्षेत्र नम्वर ३ को (क) बाट अरुण कुमार साह र श्याम नारायण चौधरीको नाम सिफारिस गरिएको छ । त्यस्तै क्षेत्र नम्वर ३ कै (ख) बाट ऋषि यादव र कलाम खाँको नाम सिफारिस गरिएको छ ।
यस्तै क्षेत्र नम्बर ४ बाट प्रतिनिधि सभाको निर्वाचनको लागि कर्मलाल चौधरीको एकल नाम सिफारिस गरिएको छ । त्यस्तै क्षेत्र नम्वर ४ को (क) बाट प्रदेश सभा सदस्यका लागि रुबी कुमारी कर्णको एकल नाम सिफारिस गरिएको छ । कर्ण मधेश प्रदेशका गृह तथा सञ्चार मन्त्रालयका बहालबाला राज्य मन्त्री हुन् । त्यस्तै क्षेत्र नम्वर ४ कै (ख) बाट प्रदेश सदस्यका लागि सुर्या यादव र किरण यादवको नाम सिरफारि गरिएको सप्तरी जिल्ला ईन्चार्ज तथा केन्द्रिय सदस्य अशोक कुमार मण्डल (अमर)ले जानकारी दिए ।
