मधेशी दलका नेताहरु एमालेको बिरोध मात्रै गरिरहेका छन् ः योगेश भट्टराई

मधेश सम्वाददाता
राजविराज, २७ भदौ ।
नेकपा एमालेका केन्द्रिय सचिव एवम् पूर्व मन्त्री योगेश भट्टराईले मधेशी दलहरुले कुनै उल्लेखनीय काम गर्न नसकेको आरोप लगाएका छन् । उनले आफूले काम नगर्ने र एमालेको बिरोध गरिरहने काममा मधेशी दलका नेता लागिपरेको बताए ।
सप्तरीको कंचनरुप नगरपालिकामा सोमबार आयोजित कार्यक्रमलाई सम्बोधन गर्दै उनले जसपा, लोसपा लगायतका मधेशी पार्टीका नेताले एमालेको विरोध मात्रै गर्ने गरेको बताए । नेता भट्टराईले गठबन्धनको सरकार बनेपछि देश विकास नै ठप्प भएको बताए ।
उनले मंसिर ४ को निर्वाचनपछि एमाले अध्यक्ष केपी ओलीको नेतृत्वमा सरकार गठन हुने दावी समेत गरे । देशको विकास गर्न जनताले आफ्नो पार्टीलाई जिताउने उनले विश्वास व्यक्त गरे ।
कार्यक्रममा नेपाल आदिवासी जनजाति महासंघका पूर्व अध्यक्ष तथा एमालेका केन्द्रीय सदस्य पासाङ शेर्पाले एमालेले मात्र आदिवासी जनजातिको पहिचान र अधिकार स्थापित गर्न सक्ने दावी गरे ।
कार्यक्रममा एमाले पोलिटव्युरो सदस्य सुमनराज प्याकुरेल, सप्तरी ईन्चार्ज दिवाकर देवकोटा, सह–ईन्चार्ज राज कुमार लेखी, जिल्ला अध्यक्ष ताराकान्त चौधरी, सदस्यहरु देव नारायण चौधरी, वसन्त कुमार मिश्र, उत्तम गौतम, आशा चौधरी, कल्पना चौधरीसहितकाले बोलेका थिए ।