मधेश सम्वाददाता
राजविराज, २७ भदौ ।
सप्तरीमा सडकमा हिंडिरहेको कुकुरलाई बचाउने क्रममा एक दम्पति सबार मोटरसाइकल दुर्घटना भएको छ । दुर्घटनामा पत्नीको मृत्यु भएको छ भने पति सकुशल छन् ।
पूर्व पश्चिम राजमार्ग अन्तर्गत शम्भुनाथ नगरपालिका वडा नम्बर ५ स्थित मोहनपुरमा सोमबार बिहान यो दुर्घटना भएको हो ।
पूर्वबाट पश्चिमतर्फ जाँदै गरेको प्रदेश २–०१–००२ प ३९९३ नम्बरको मोटरसाइकल कुकुरलाई बच्चाउने क्रममा आफै अनियन्त्रित भई दुर्घटना भएको प्रहरीले जनाएको छ । उक्त दुर्घटनामा मोटरसाइकलको पछाडि सबार ४५ बर्षीया पत्नी अञ्जनादेवी यादवको मृत्यु भएको छ । घाइते भएकी उनलार्ए उपचारका लागि रुपनीस्थित युनिक अस्पतालमा ल्याउँदा चिकित्सकले मृत घोषणा गरेको सप्तरी प्रहरीका प्रबक्ता एवं डीएसपी माधव प्रसाद काफ्लेले जानकारी दिए ।
मोटरसाइकल चालक मृतकका पति ४८ बर्षीय मोहनकुमार यादवलाई केही नभएको प्रहरीले जनाएको छ । यी दम्पति बोदेबर्साइन नगरपालिका वडा नम्बर २ का बासिन्दा हुन् ।
