राजविराज । नेपालका सिंगल स्क्रिन सिनेमा हलका सञ्चालकहरुले नेपालमा प्रदर्शन हुन गइरहेको बहुप्रतीक्षित हिन्दी चलचित्र ‘रामायण’ आफूहरुले पनि प्रदर्शन गर्न पाउनुपर्ने माग राखेका छन् ।
चलचित्र ‘रामायण’ ४ के प्रोजेक्टर वा २ के जस्ता विशेष प्राविधिक सुविधा भएका सिनेमा हलहरूमा मात्र प्रदर्शन गर्न पाउने, तर सामान्य प्रोजेक्टर भएका सिंगल स्क्रिन सिनेमा हलहरूमा प्रदर्शन गर्न नपाउने अवस्थाप्रति आफूहरुलाई चिन्तित बनाएको उनीहरुले बताएका छन् ।
‘वर्षौंदेखि नेपाली चलचित्र उद्योगको विकास, स्थानीय दर्शकको मनोरञ्जन तथा चलचित्र व्यवसायको विस्तारमा महत्वपूर्ण योगदान पुर्याउँदै आएका सिंगल स्क्रिन सिनेमा हलहरूलाई यसरी अवसरबाट वञ्चित गरिनु न्यायोचित देखिँदैन’ विज्ञप्ती जारी गरेर उनीहरुले भनेका छन्, ‘यदि चलचित्र प्रदर्शनका लागि निश्चित प्राविधिक मापदण्ड आवश्यक हो भने त्यसको स्पष्ट, पारदर्शी र समान रूपमा लागू हुने व्यवस्था गरिनुपर्छ । प्रविधिको नाममा साना तथा क्षेत्रीय सिनेमा हलहरूलाई व्यावसायिक अवसरबाट वञ्चित गरिनु हुँदैन ।’
प्राविधिक रूपमा योग्य सिंगल स्क्रिन सिनेमा हलहरूलाई पनि ‘रामायण’ चलचित्र प्रदर्शनको समान अवसर प्रदान गर्नुपर्ने, चलचित्र प्रदर्शनसम्बन्धी प्राविधिक मापदण्ड स्पष्ट र पारदर्शी बनाउनुपर्ने, साना तथा क्षेत्रीय सिनेमा हलहरूको व्यावसायिक अधिकार र अस्तित्व संरक्षण गर्नुपर्ने, चलचित्र प्रदर्शनसम्बन्धी निर्णय गर्दा ठूला मल्टिप्लेक्ससँगै सिंगल स्क्रिन हलहरूको अवस्था र दर्शकको पहुँचलाई पनि प्राथमिकता दिनुपर्ने उनीहरुको माग छ ।
विज्ञप्तीमा नेपाल सरकार, सञ्चार तथा सूचना प्रविधि मन्त्रालय, चलचित्र विकास बोर्ड तथा सम्बन्धित चलचित्र नियामक निकायको यसबारे गम्भीर ध्यानाकर्षण गराइएको छ ।
‘सिंगल स्क्रिन सिनेमा हलको संरक्षण भनेको चलचित्र व्यवसाय, स्थानीय रोजगारी र आम दर्शकको पहुँचको संरक्षण पनि हो’ विज्ञप्तीमा भनिएको छ, ‘अतः नेपाल सरकार तथा सम्बन्धित निकायले यस विषयमा तत्काल आवश्यक पहल गरी न्यायोचित निर्णय लिनुहुन हार्दिक आग्रह गर्दछौँ ।’
शिबकशंकर चलचित्र मन्दिर राजविराज, म्याङो प्लेजर प्रालि खैरहनी चितवन, गोलबजार सिनेप्लेक्स सेन्टर प्रालि सिरहा, त्रिमुर्ती सिनेमा प्रालि वीरगञ्ज, फन मुभिज गजुरी धादिङसहितका सञ्चालकले संयुक्त विज्ञप्ती मार्फत् यस्तो माग गरेका हुन् ।
