मधेश आएका ओलीले दिन खोजे यी सन्देश

मधेश सम्वाददाता
जनकपुरधाम, २७ भदौ ।
पार्टी प्रवेश गराउन सोमबार मधेश प्रदेशको राजधानी आएका नेकपा एमालेका अध्यक्ष केपी शर्मा ओलीले आफू मधेशबिरोधी नरहेको भन्न बिभिन्न सन्देश प्रवाह गरेका छन् । उनले नागरिकता दिने सवालमा एमाले बिरोधी नभएको समेत बताए ।
उनले अब मधेशमा एमाले मजबुत हुँदै गएको बताउँदै कसैस्ँग गठबन्धन पनि नगर्ने बताए । उनले लोकतान्त्रिक समाजवादी पार्टी (लोसपा) का वरिष्ठ नेता राजेन्द्र महतोले उम्मेदबारी दिएको धनुषा–३ मा आफ्नै उम्मेदबार उठाउने बताए ।
ओलीले भने, ‘३ नम्बरबाटै बोलिरहेको छु । कसैलाई भ्रम नहोस् । यस क्षेत्रमा एमाले उठछ, एमालेले आफ्नै उम्मेदबार उठाउँछ ।’
‘धेरै मानिसहरु प्रवेश गरेपछि एमाले यहाँ पनि मजबुत भयो त्यसकारण यसो एमालेसँग पनि साँठगाँठ गरेर फुत्काउन पाइन्छ कि भनेर सोंच्या होला’ उनले भने, ‘त्यो कुरा हुनेबाला छैन् । एमालेले यस क्षेत्रमा आफ्नै उम्मेदबार उठाउँछ ।’
धनुषा क्षेत्र नम्बर ३ बाट लोसपा नेता महतो चुनाव लड्ने तयारीमा छन् भने एमालेले यो क्षेत्रबाट जुली महतोको नाम सिफारिस गरेको छ ।
नेकपा एमाले र लोसपाबीच आगामी निर्वाचनका लागि तालमेल हुने चर्चा चलिरहँदा ओलीको यस्तो प्रतिकृया आएको हो ।
कार्यक्रममा एमाले सचिव एवं मधेश प्रदेश इन्चार्ज रघुबीर महासेठले प्रदेशको कुल ३२ मध्ये १० वटा सिटमा एमाले जित्ने बताएपछि ओलीले महासेठसँग प्रश्न गरे, ‘अरु सिट कसका लागि छाड्ने त ?’ उनले सबैतिर आफ्नै उम्मेदबार उठाउने संकेत गरे ।
असोज ८ गते धनुषाकै क्षेत्र नम्बर २ मा हजारौंको एमालेमा प्रवेश हुन्छ, प्रवेश गराउन म आफैं आउँछु’ उनले भने, ‘ एमालेबाहेक कसैले पार्टी जोगाउन सक्ने अवस्था छैन् ।’
अध्यक्ष ओलीले एमाले कसैसँग कुनै गठबन्धन पनि नगर्ने बताए । ‘आफ्नै खुट्टामा उभिन नसक्ने, अनि सहारा लगाउनुपर्ने पार्टी एमाले होइन्’ उनले भने, ‘एमाले आफ्नै खुटामा उभिन सक्छ, आफ्ना नीति र उद्देश्यमा चल्छ । समृद्ध नेपाल, सुखी नेपालीको राष्टिय संकल्प तोकेर त्यो पूरा गर्न आफ्नै बुतामा अघि बढ्छ ।’
गठबन्धन अत्यन्तै अपवित्र भएको उनले बताए । ‘गठबन्धन अपिवत्र कुरा हो, उद्देश्यबिहीन नीतिहिन, गन्तव्यहिन, सिद्धान्तहिन, कार्यक्रमबिहीन, योजना नभएको यस्तो गठबन्धन एमालेले गर्दैन्’ उनले भने ।
चुनावी तालमेल भने हुन सक्ने उनले बताए । ‘लोकतन्त्रमा कहिले–कहिले, कुनै–कुनै पार्टीको रेस्क्यु पनि गरिदिनुपर्ने हुन्छ’ उनले भने, त्यसका निम्ति तालमेल हुन सक्छ ।’
ओलीले जन्मसिद्ध नागरिकका सन्तालई बंशजको आधारमा नागरिकता उपलब्ध गराउने कुरा मात्रै थपिए नागरिकता विधेयक पारित हुने बताए ।
जन्मसिद्ध नागरिकका सन्तानलाई बंशजको आधारमा नागरिकता प्रमाण पत्र उपलब्ध गराउने मात्रै संसदमा पारित गराउनुपर्ने उनले बताए । ‘प्रस्ताव ल्याउँ संसदमा पारित गराउने जिम्मा मेरो’ उनले भने, ‘प्रतिपक्षीले तुरन्त समर्थन गर्छ । एमालेले साथ दिन्छ । तुरन्त पास गर्छ ।’
यति प्रस्ताव मात्रै ल्याएपछि संसदमा पारित गराउने जिम्मा आफ्नो भएको उनले बताए । ‘जन्मसिद्धका नागरिकले नागरिकता पाउनुपर्छ भन्ने एमालेको नारा हो । म सात दिनदेखि कराइरहेको छु’ उनले भने, ‘तर एमालेले नागरिकताको प्रमाण पत्र दिएन भनेर भ्रम फैलाउने, जनता अल्मल्याएर भोंटको राजनीति गर्न खोजेको छ ।’
ओलीले गठबन्धनका नेताहरुको अनुहराबाट मुस्कान हराइसकेको समेत बताएका छन् ।
अहिले उहाँहरुको हडबडी र त्रास छ’ उनले भने, ‘उहाँहरुले मंसिर ४ गतेको परिणाम हेरिसक्नुभएको छ ।’
उहाँहरुलाई गठबन्धन गर्नुपर्ने बाध्यता नै रहेको उनले बताए । ‘गठबन्धन नगरी एमालेतिर नहेरे हुन्छ । आँट नगरे हुन्छ’ उनले भने, ‘यो कुरा शेरबहादुरजीले राम्ररी बुझनुभएको छ । पुष्कपकल दाहालजीले बुझनुभएको छ ।’
कुनै सिद्धान्तको जलप लगाएर, नक्कली मुद्दा खडा गरेर, अफवाह फैलाएर नेपाली जनताको भविष्य अँधकारमा राख्ने छुट कसैलाई नभएको उनले बताए ।