दिपेश जोशी
राजविराज । सप्तरीकी एक महिलाले सडकमै बच्चा जन्माएकी छन् । राजविराजस्थित गजेन्द्रनारायण सिंह अस्पतालमा प्रसुति गराउन आएकी महिलाले अस्पताल अगाडिकै सडकमा बच्चा जन्माएकी हुन् ।
मंगलबार राति प्रसुति गराउन आफ्ना श्रीमानसँगै अस्पताल आएकी ती महिलाले बुधबार बिहान ४ः३० बजे सडकमै बच्चा जन्माएकी हुन् ।
राजविराज नगरपालिका वडा नम्बर १४ निवासी हरेराम पासवानकी श्रीमति बबिताले अस्पतालल अगाडिको मुख्य सडकमै छोरा बच्चा जन्माएकी हुन् ।
प्रसुति गराउन आउँदा ड्यूटीमा खटिएका स्वास्थ्यकर्मीले भिडियो एक्सरेसहित केही जाँच गराउन भनेका थिए । बबिताका अनुसार उक्त जाँच गराउन आउँदा काउन्टरमा तीन हजार २०० रुपैयाँ शुल्क भनेपछि आफूहरु अन्यौलमा परेका थियौं ।
रकम अभावले जाँच गराउन नसक्दा बबिता, उनका श्रीमान र अर्की सहयोगी महिला सडकमा आएर बसेका थिए ।
बसेको करिब एक घण्टापछि सडकमै व्यथा लागेको र त्यहीं क्रममा उनले शिशुको जन्म दिएको हरेराम बताउँछन् ।
अस्पतालका निमित्त मेडिकल सुपरिटन्डेन्ट (मेसु) जितेन्द्र कँडेलले ती महिला २ बजेतिर अस्पताल आउँदा रगत, पिसाव परीक्षणको रिपोर्ट नभएको बताए । आवश्यक रहेकै कारण केही जाँच गराउन भनिएको बताउँदै कँडेलले महिला या उनको परिवारले पैसा छैन भन्ने कुरा कसैलाई कुनै जानकारी नगराएको बताए ।
राजविराज नगरपालिकाका कावा प्रमुख इसरत परबिनले घटनाप्रति दुःख व्यक्त गरेकी छन् ।
‘महिलालाई बेडमा राख्नुपर्थ्यो, उपचार गर्नुपर्थ्यो, पैसाको कुरा पछि पनि हुन्थ्यो’ उनले भनिन्, ‘यत्रो लापर्वाही कसरी गरियो ? यसको जवाफ दिनुपर्छ ।’
सिसिटिभी फुटेज मार्फत् अस्पताल अगाडिकै सडकमा महिलाले बच्चा जन्माएको तथ्य बाहिरिएपछि अहिले स्वास्थ्यकर्मीको आलोचना हुन थालेको छ । गरीब, असहाय, विपन्नका लागि सरकारी अस्पतालले निःशुल्क प्रसुति गराउनुपर्ने हो । डयुटीमा रहेका स्वास्थ्यकर्मीले यसतर्फ ध्यान दिनुपर्ने हो । तर दिइएको छैन् । आगामी दिनमा अस्पतालका चिकित्सक र स्वास्थ्यकर्मी यस्ता घटनाप्रति गम्भीर बन्नु जरुरी छ ।
