राजविराज, २९ जेठ — सप्तरीको विष्णुपुर गाउँपालिकास्थित श्री जनता माध्यमिक विद्यालयमा स्वास्थ्य, पोषण तथा बाल विकास कार्यक्रमको उपलब्धि उत्सव तथा कार्यक्रम हस्तान्तरण सम्पन्न भएको छ।
सेभ द सप्तरी र सेभ द चिल्ड्रेनको साझेदारीमा आयोजित कार्यक्रममा स्वास्थ्य, पोषण तथा बाल विकास क्षेत्रमा हासिल भएका उपलब्धिको समीक्षा गर्दै कार्यक्रम स्थानीय तहलाई हस्तान्तरण गरिएको हो।
सन् २०१३ देखि सञ्चालन हुँदै आएको ‘सामुन्नति’ कार्यक्रममार्फत सुरक्षित मातृत्व, नवजात शिशु स्वास्थ्य, किशोरकिशोरी यौन तथा प्रजनन स्वास्थ्य तथा विद्यालय स्वास्थ्य र पोषण प्रवर्द्धनमा उल्लेखनीय उपलब्धि हासिल भएको जानकारी दिइयो।
कार्यक्रमका क्रममा विष्णुपुर गाउँपालिकाका स्वास्थ्य संस्थाहरूमा गरिएको पूर्वाधार सुधार, उपकरण सहयोग, क्षमता अभिवृद्धि तथा सेवा सुदृढीकरणसम्बन्धी स्वास्थ्य चौकी प्रोफाइल गाउँपालिकालाई हस्तान्तरण गरिएको थियो।
स्वास्थ्यकर्मीहरूले कार्यक्रमपछि संस्थागत सुत्केरी दर बढेको, मातृ तथा नवजात शिशु स्वास्थ्य सेवाको गुणस्तरमा सुधार आएको तथा किशोरकिशोरीहरूको स्वास्थ्य सेवामा पहुँच विस्तार भएको बताए। सहभागीहरूले कार्यक्रमको दिगोपनका लागि स्थानीय तहबाट बजेट व्यवस्थापन गरी निरन्तरता दिने प्रतिबद्धता व्यक्त गरेका थिए।
