राजविराज । राजविराज नगरपालिकालाई साक्षर घोषणा गरिने भएको छ ।
अनौपचारिक एवं जीवन पर्यन्त शिक्षा अन्तर्गत साक्षर नगर घोषणा कार्यक्रम गर्न लागिएको नगरपालिकाले जनाएको छ ।
१५ बर्षदेखि ६० बर्ष उमेर समूहका व्यक्तिलाई साक्षर बनाउने लक्ष्य रहेको नगरपालिकाका शिक्षा शाखा प्रमुख भोगेन्द्र यादवले जानकारी दिए । उनका अनुसार पहिला वडाहरु घोषणा गरिनेछ भने त्यसपछि नगरलाई घोषणा गरिनेछ ।
यसका निम्ति शुरुवाती चरणमा नगरभित्रका विद्यालयहरुमा कक्षा १० मा अध्ययनरत विद्यार्थीलाई खटाइएको छ । साक्षर हुन चाहने व्यक्तिको नामावली संकलन गर्न कक्षा १० मा अध्ययनरत छात्रछात्रालाई खटाइएको हो । विद्यार्थीहरु मंगलबार आफ्नै टोलमा नामावली संकलन गरेका छन् । उनीहरुले बुधबार समेत नामावली संकलन गर्ने कार्यक्रम रहेको शिक्षा शाखा प्रमुख यादवले बताए ।
उनका अनुसार साक्षर हुनका लागि साधारण लेखपढ, मोवाइल चलाउन जान्ने, क्यालेण्डर हेर्न सक्ने, साधारण हरहिसाब गर्न सक्नेसहितका १२ वटा सूचक राखिएका छन् । यी सबै सूचकमा दक्ष बनाएर साक्षर बनाइने लक्ष्य नगरपालिकाले लिएको छ ।
चालू आ.ब.को संघीय सशर्त अनुदान अन्तर्गत यो कार्यक्रम गर्नलागिएको नगरपालिकाले जनाएको छ ।
