मधेश सम्वाददाता
राजविराज, २७ असोज ।
संघीय सरकारमा सहभागी जनता समाजवादी पार्टी (जसपा) बाट प्रतिनिधित्व गर्ने चार मन्त्रीलाई प्रधानमन्त्रीले बिहीबार बर्खास्त गरेका छन् ।
आगामी चुनावी तालमेलको क्रममा सत्ता गठबन्धन छाडेर जसपा एमालेसंग गएपछि केन्द्र सरकारमा रहेका उसका संघीय मामिला तथा सामान्य प्रशासन मन्त्री बनेका राजेन्द्र श्रेष्ठ, कृषि तथा पशुपंक्षी विकासमन्त्री बनेका मृगेन्द्रकुमार सिंह यादव, भौतिक पूर्वाधार तथा यातायातमन्त्री मोहम्मद इश्तियाक राई र वन तथा वातावरण मन्त्री प्रदीप यादवलाई प्रधानमन्त्री शेरबहादुर देउवाले बर्खास्त गरेका हुन् ।
संघीय सरकारबाट मन्त्री हटाएपछि जसपा नेतृत्वको मधेश प्रदेश सरकारले पनि पाँच दलीय गठबन्धनबाट मन्त्री बनेकाहरुलाई हटाउने तयारी गरेको छ । मधेश प्रदेश सरकारमा सहभागी पाँच दलीय गठन्धनका मन्त्रीहरुलाई मुख्यमन्त्री लालबाबु राउतले हटाउने तयारी गरेका छन् । यहाँ जसपाको नेतृत्वमा सरकार छ ।
यस विषयमा अहिले छलफल भइरहेको मधेश सरकारका प्रवक्ता समेत रहेका अर्थमन्त्री शैलेन्द्र साहले बताए ।
’अहिले निर्णय नै भइसकेको छैन । पाँच दलीय गठबन्धनका मन्त्रीहरुलाई हटाउने विषयमा छलफल भइरहेको छ’ उनले भने ।
प्रदेश सरकारमा काँग्रेसका तीन एकीकृत समाजवादीका २ मन्त्री र एक राज्यमन्त्री, माओवादीका एक मन्त्री र एक राज्यमन्त्री छन् ।
कांग्रेसबाट प्रदेश सरकारमा भौतिक पूर्वाधार विकासमन्त्री रामसरोज यादव, खानेपानी तथा उर्जा विकासमन्त्री ओमप्रकाश शर्मा र महिला, बालबालिका, युवा तथा खेलकुदमन्त्री विरेन्द्र प्रसाद सिंह छन् ।
नेकपा एकीकृत समाजावादीबाट उद्योग, पर्यटन तथा वनमन्त्री शत्रुधन महतो, कानून, न्याय तथा प्रदेश सभा मामिलामन्त्री प्रमोद यादव र राज्य मन्त्री नागेन्द्र राय यादव छन् । यस्तै नेकपा माओवादी केन्द्रबाट गृह तथा सञ्चार मन्त्री भरत प्रसाद साह र राज्यमन्त्री रुबीकुमारी कर्ण छन् ।
