राजविराज । भ्रष्टाचारबिरुद्ध तथा सामाजिक संजाल खुल्ला राख्नुपर्नेसहितका माग राख्दै आन्दोलनमा उत्रेका जेनजीको टोलीमाथि प्रहरीले अन्धाधुन्ध गोली प्रहार गरी दर्जनौंको ज्यान लिएको घट्नाप्रति सप्तरीका तीन संस्थाले कडा भत्र्सना गरेको छ ।
उच्च अदालत राजविराज एशोसिएशन, नेपाल पत्रकार महासंघ एवं मानवअधिकार समिति उच्च अदालतले साेमबार संयुक्तरूपमा विज्ञप्ति जारी गर्दै काठमाडौंसहित देशका बिभिन्न शहरमा आन्दोलनमा उत्रेका प्रदर्शनकारीमाथि प्रहरीले बर्बरतापूर्वक गोली प्रहार गरी ज्यान लिनु र सयौंलाई घाइते बनाउनु सरकारको निरंकुशभन्दा ठूलो कदम भएको बताएको छ ।
‘हामी यो घट्नाप्रति स्तब्ध एवं मर्माहत भएका छौं । घट्नाको कडा रुपमा भत्र्सना गर्दछौं । यो घट्नाको जति निन्दा गरेपनि कमै हुन्छ’ विज्ञप्तिमा भनिएको छ ।
जुनसुकै प्रदर्शनमाथि दमन गर्नु नहुने, हाम्रै संविधानले प्रेस तथा अभिव्यक्ति स्वतन्त्रता प्रदान गरेको भन्दै विज्ञप्तिमा यसतर्फ सरकारको ध्यान नगई आफ्नै नागरिकको ज्यान लिनु सरकारको नालायिकिपन भएको उल्लेख गरिएको छ ।
‘यसले सरकार जनताका लागि नभई आफ्नो स्वेच्छाचारीमा लागेको पुष्टि गराउँछ’ विज्ञप्तिमा भनिएको छ ।
यस किसिमको दमन रोक्न सरकारको ध्यानाकर्षण गराउँदै मृतकको परिवारलाई क्षतिपूर्ती उपलब्ध गराउन, घाइतेको निःशुल्क उपचार गर्न माग गर्दै विज्ञप्तिमा भनिएको छ, ‘साथै आन्दोलनरत पक्षलाई अबिलम्ब वार्तामा बोलाई समस्याको समाधान गर्न हामी सरकारसँग आग्रह गर्दछौं ।’
उच्च अदालत राजविराज एशोसिएशनका अध्यक्ष हरेराम यादव, नेपाल पत्रकार महासंघ, सप्तरीका अध्यक्ष श्रवण कुमार देव एवं मानवअधिकार समिति उच्च अदालतका संयाेजक माे. समीम अख्तर अलीले संयुक्तरूपमा विज्ञप्ति जारी गरेका हुन् ।
