राजविराज । सप्तरीको खडक नगरपालिकामा प्रमुख प्रशासकीय अधिकृतको कार्यकक्षभित्रका सम्पूर्ण फर्निचर बाहिर ल्याएर राखिएको छ ।
नगरपालिकाका मेयर जयपै्रकाश चौधरीको निर्देशनमा ज्यालादारी कर्मचारीले प्रमुख प्रशासकीय अधिकृत बस्ने कुर्सी, टेबलसहितका फर्निचर, नेम प्लेट समेत झिकेर राखेका छन् ।
यो पालिकाको प्रमुख प्रशासकीय अधिकृतको रुपमा बिनय सोनु कार्यरत छन् । सोनुलाई काम गर्न नदिने मनसायका साथ मेयर चौधरीले कार्यकक्षभित्रका सबै सामान नै बाहिर ल्याएर राख्न लगाएका हुन् ।
प्रमुख प्रशासकीय अधिकृत सोनु आएदेखि नै स्थानीय तह संचालन ऐन र नियमावली बिपरित काम गर्न भनेको र नमान्दा मेयर चौधरीले उनको कार्यकक्ष नै खाली गराएका हुन् । ‘दिन नमिल्ने भुक्तानी गराउन, गर्न नसकिने काम गराउन मेयरज्यूले अत्यधिक दवाव दिनुभयो’ प्रमुुख प्रशासकीय अधिकृत सोनु भन्छन्, ‘नमान्दा उहाँले कार्यालयमा बस्ने वातावरण नै बिगार्नुभएको छ ।’
यो पालिकाको सभा निर्धारित समय असारमै सम्पन्न भएको छ । नयाँ आर्थिक बर्ष शुरु भएपछि कामकाजलाई अगाडि बढाउनुपर्ने हो । तर, मेयर चौधरीले प्रमुख प्रशासकीय अधिकृत सोनुबाट काम नगराउने मनसायका साथ कार्यपालिका बैठक समेत बोलाएका छैनन् ।
ज्यालादारी र करारका कर्मचारीको म्याद थप्ने बिषयमा कार्यपालिकाको बेठक बस्न सकेको छैन् भने मेयर चौधरीले खाता खोल्न अख्तियारी समेत दिएका छैनन् ।
मेयर चौधरीले कार्यकक्षभित्रको सामान मात्रै हटाएका छैनन् । कार्यालयमा आउन त्रास उत्पन्न गराएको प्रमुख प्रशासकीय अधिकृत सोनुको भनाई छ । ‘कार्यालय आउँदा दुव्र्यबहार गर्नु भनेर केहि व्यक्तिलाई भनेको आफूले सूचना पाएको छु’ सोनुले भने, ‘यसरी कसरी काम गर्न सकिन्छ ?’
आफू ऐन र नियमको परिधिभित्र काम गर्न तयार रहेको उनी बताउँछन् । यद्यपी बलजफ्ती तरिकाले गर्न लगाउने काम गर्न नसकिने बताए ।
यस बिषयमा मेयर चौधरीसँग पटक पटक फोन सम्पर्क गर्दा समेत उनले फोन उठाएनन् । यद्यपी उनले एक टेलिभिजनसँग कुराकानी गर्दै प्रमुख प्रशासकीय अधिकृतलाई निषेध गर्न खोजेकै प्रतिकृया दिएका छन् । नगरपालिकामा मनोमानी काम गरिरहेकाले उनलाई निषेध गर्न खोजेको उनले बताएका छन् ।
