दिपेश जोशी
राजविराज । राजविराजमा गत असाेजमा आयाेजना गरिएको अन्तर्राष्ट्रिय देव महासम्मेलनको आय व्यय सार्वजनिक गरिएको छ ।
आयोजकले शनिबार राजविराजस्थित वागेश्वरी मन्दिर प्राङ्गणमा पत्रकार सम्मेलन गरी आय व्यय सार्वजनिक गरेको हो ।
आयोजकका संयोजक इन्जिनियर इन्द्रनारायण देवले महासम्मेलनका निम्ति कुल रु. १२ लाख ५७ हजार ४०५ सहयोग प्राप्त भएको जानकारी दिए । स्वजातीय विभिन्न व्यक्तिबाट उक्त सहयोग प्राप्त भएको उनले बताए ।
उनका अनुसार ५१ हजारका दरले १० जना, २५ हजारका दरले १० जना, २८ हजार ७०० एक जना, ११ हजारका दरले ४ जना, १० हजारका दरले १५ जना, ६ हजारका दरले एक जना, ५ हजार १०५ का दरले एक जना, ५१०० का दरले २ जनाले सहयोग गरेका छन् ।
यस्तै, ५ हजारका दरले ३८ जना, ३ हजार १०० का दरले एक जना, २ हजार १०० का दरले एक जना, २ हजारका दरले ४ जना, १ हजार १०० का दरले एक तथा एक हजारका दरले १६ जनाले सहयोग गरेको उनले बताए ।
त्यस्तै, सहभागी भएका ४२६ जनाबाट ३३ हजार १०० प्रवेश शुल्क समेत उठेको उनले बताए ।
रु. १२ लाख ५७ हजार ४०५ आम्दानीमध्ये रु. ११ लाख ५० हजार ४७६ खर्च भएको आयोजकले जनाएको छ । रु. एक लाख ६ हजार ९२९ बाँकी रहेको अध्यक्ष देवले बताए ।
उनका अनुसार सचिवालय व्यवस्थापन, चिया, खाजा, खाना, आवासीय व्यवस्था, टेन्ट, स्टेशनरी, इन्धन, दाेसल्ला, छपाई, प्रचार प्रसारसहितकामा खर्च भएको आयोजकले जनाएको छ ।
पत्रकार सम्मेलनमा आयोजकका सह संयोजक इन्द्रकुमार देव, सदस्यहरु प्रतापनारायण चौधरी, मीरा देवसहितकाले महासम्मेलन सफल पार्न सहयोग गर्ने सबैलाई धन्यवाद दिए ।
गत असोज १७ देखि तीन दिनसम्म अन्तर्राष्ट्रिय देव महासम्मेलनको आयोजना गरिएको थियो । महासम्मेलनमा नेपाल र भारतको विभिन्न ठाउँका देव समुदायको उल्लेख्य सहभागिता रहेको थियो ।
वागेश्वरी सेवा समिति, भवानी सेवा समिति, देव सेवा समिति काठमाडौ, देव समाज काठमाडौ, विराट देव सेवा समिति र झापा देव सेवा समितिको संयुक्त रूपमा महासम्मेलनकाे आयाेजना गरिएको थियोे ।
