राजविराज । सप्तरी प्रशासनले भारतीय सीमानाकाबाट अनुमति लिएर आए/नआएका विदेश नागरिकहरुको सुक्ष्म निगरानी गर्ने भएको छ ।
जिल्ला सुरक्षा समितिको बसेको बैठकले यस्तो निर्णय गरेको हो । जिल्लामा ७८ किलोमिटर रहेको सीमानाकामा दैनिक रुपमा पहिचान खुल्ने नागरिकता तथा अन्य परिचय पत्रका आधारमा अभिलेख राखी आवत जावतमा निगरानी बढाउन जिल्ला प्रहरी कार्यालय र सशस्त्र प्रहरी बल नेपाल नम्बर ६ गणले व्यवस्था मिलाउने निर्णय भएको जिल्ला प्रशाशन कार्यलयले जनाएको छ ।
बैठकले जिल्लाभित्र विदेशी नागरिकहरुको उपस्थिति कानून विपरीत गरेको गतिविधी तथा क्रियाकपाललाई निरन्तर रुपमा निगरानीका लागि सबै सुरक्षा निकायहरु सघन रुपमा गस्ती पेट्रोलिङ्ग गर्ने, जिल्लास्थित होटल तथा लजहरुमा रात्रिकालिनको समयमा वास बस्न आउने आगन्तुक/विदेशी/नागरिकहरुको परिचय खुल्ने कागजात लिएर मात्र वास बस्ने व्यवस्था मिलाउने निर्णय गरेको छ ।
जिल्लाभित्र नियमित काम गर्ने इजाजत प्राप्त विदेशी नागरिक, टुरिस्ट भिसामा आइ काम गर्ने नागरिक विना इजाजत काम गर्ने वा लुकिछुपी बसेका विदेशी नागरिकहरुको सम्बन्धमा सूचना संकलन गरी कानून कारवाहीको दायरामा ल्याउन सबै सुरक्षा निकायहरु परिचालित हुने, सबै स्थानीय तहका विद्यालयहरुमा कुनै किसिमको शंकास्पद विद्यार्थी पढाईको वहानामा एडमिसन गर्न आएमा निजको बारेमा विशेष जानकारी लिई नजिकको सुरक्षाकर्मी / प्रहरीमा जानकारी गराउन बैठकले सबैसँग अनुरोध गरेको छ ।
सबै स्थानीय तहरुले नगर स्तर वडा स्तरमा विदेशी नागरिकहरु कानून विपरीत प्रवेश गर्न सक्ने सम्बन्धमा जनचेतनाका लागि अन्तरक्रिया/बैठक/छलफल कार्यक्रम आयोजना गर्ने व्यवस्था मिलाउने र त्यसबाट प्राप्त सूचना नजिकको सुरक्षा निकायलाई जानकारी समेत गराउने, समुदायमा विदेशी धर्मको प्रचार प्रसार तथा धर्म विरोधी धार्मिक गतिविधीसँग सम्बन्धी कार्यहरु भए/गराएको खण्डमा सो विषयमा आवश्यक चासोकासाथ जिल्ला प्रशासन कार्यालय वा सुरक्षा निकायमा सुचना सम्प्रेशन गर्न राजनीतिक दल, नागरिक समाज, जनप्रतिनीधी समाज सेवी र स्थानीय बासीसँग आग्रह गरिएको छ ।
जिल्ला भित्र प्रवेश गर्न सक्ने विदेशी नागरिक त्यसबाट हुनसक्ने कानून विपरीतको गतिविधीको सम्बन्धमा अडियो/भिडियोको माध्यमबाट सूचना सम्प्रेषणका लागि पत्रकार महासंघलाई अनुरोध गर्ने निर्णय भएको प्रमुख जिल्ला अधिकारी टुवराज पोखरेलले जानकारी दिए ।
