राजविराज । सप्तरीमा हराएका मध्ये १११ जना अहिलेसम्म फेला पर्न सकेका छैनन् । साढे ३ बर्षको अवधीमा हराएका बालबालिका, महिला तथा ज्येष्ठ नागरिकमध्ये १११ जना फेला पर्न नसकेको प्रहरीले जनाएको छ ।
लैङ्गिक हिंसाबिरुद्ध जिल्ला प्रहरी कार्यालय, सप्तरीले आईतबार आयोजना गरेको अन्तरकृया कार्यक्रममा यस्तो तथ्यांक प्रस्तुत गरिएको हो ।
आर्थिक बर्ष २०७८/७९, ०७९/८०, २०८०/८१ र चालू आ.ब. २०८२/८३ को हालसम्म हराएका १११ जना फेला पर्न नसकेको प्रहरी निरीक्षक अनिल साहले जानकारी दिए ।
२०७८/७९, ०७९/८०, २०८०/८१ को त्रिबर्षीय तथ्यांक प्रस्तुत गर्दै उनले यो तीन बर्षमा ४२६ जना हराएकोमा ३६१ जना भेटिएको र ६५ जना अझै भेटिएका छैनन् ।
ती बर्षहरुमा ४६ जना बालक हराएकोमा ३९ जना भेटिएको र ७ जना नभेटिएको बताए ।
यस्तै १५२ जना बालिका हराएकोमा ११९ जना भेटिएको, २११ जना महिला हराएकोमा १९५ जना भेटिएको र ९ जना ज्येष्ठ नागष्रिक हराएकोमा ८ जना भेटिएको उनले बताए ।
यस्तै, चालू आ.ब. २०८२/८३ को साउनदेखि अहिलेसम्म १३९ जना हराएकोमा ८० जना भेटिएको र ४६ जना अझै नभेटिएको तथ्यांक प्रहरीले दिएको छ ।
यो अवधीमा १० जना बालक हराउँदा ८ जना फेला परेको, ५२ जना बालिका हराउँदा ३२ जना भेटिएको, ६१ जना महिला हराउँदा ३१ जना भेटिएको, १४ जना पुरुष हराउँदा ८ जना भेटिएको र २ जना ज्येष्ठ नागरिक हराउँदा १ जना भेटिएको तथ्यांक कार्यक्रममा प्रस्तुत गरियो ।
कार्यक्रममा प्रहरी निरीक्षक साहले हराएर फेला पर्न नसकेका व्यक्तिहरुको खोजी सम्बन्धित एरियाका प्रहरी कार्यालय मार्फत् भइरहेको बताए ।
