राजविराज । सप्तरीमा आन्तरिक राजस्व कार्यालय स्थापनाको माग गर्दै संघर्ष समितिले आज जिल्लाका सम्पूर्ण सरकारी कार्यालय बन्द गराउँदैछ ।
जिल्लास्थित सम्पूर्ण पालिका, वडा कार्यालयसहित सम्पूर्ण सरकारी कार्यालय बन्द गराइने संघर्ष समितिले जनाएको छ ।
जिल्लामा आन्तरिक राजस्व कार्यालय स्थापना नगरिएसम्म करदाता सेवा कार्यालय बाहिर नसार्न भन्दै जिल्लामा मोहन यादवको संयोजकत्वमा संघर्ष समिति बनाइएको छ । समितिमा राजनीतिक दलका प्रतिनिधी, उद्योगी, व्यवसायी समेतको सहभागिता छ ।
आन्तरिक राजस्व कार्यालय स्थापनाको माग गर्दै संघर्ष समितिले आईतबार २ घण्टा र सोमबार ३ घण्टा जिल्ला प्रशासन कार्यालय अगाडि धर्ना दिएको छ ।
माग पूरा नभए पुनः बैठक बसी संघर्षका कार्यक्रम तय गर्ने संघर्ष समितिले जनाएको छ ।
४० हजार करदाता रहेको ठाउँमा राजस्व विभागकै नीति अनुरुप आन्तरिक राजस्व कार्यालय स्थापना गर्नुपर्नेमा ७२ हजारभन्दा बढी करदाता रहेको जिल्लामा करदाता सेवा कार्यालय समेत हटाउनु दुःखद भएको संघर्ष समितिले जनाएको छ ।
सप्तरीमै आन्तरिक राजस्व कार्यालयको स्थापनाका लागि जग्गा समेत छुट्टयाइएको र नेपाल सरकारबाट भवन निर्माणका लागि बजेट समेत विनियोजन भइसकेको अवस्थामा अन्तै सारिए मान्य नहुने संघर्ष समितिले जनाएको छ ।
