राजविराज । राजविराजको हटियाभित्रको सपिङ कम्प्लेक्स आगामी बैशाख २ गते उद्घाटन गरिने भएको छ ।
जिल्ला प्रशासन कार्यालयमा बसेको सरोकारबालाको बैठकले २०८२ साल बैशाख २ गते सपिङ कम्प्लेक्सको उद्घाटन गरिने निर्णय गरेको छ । त्यसअघि २५ चैतसम्म निर्माण सम्पन्न गरिनेछ । यसका लागि सम्बन्धित कार्यालयहरुले आवश्यक समन्वय र सहजीकरण गर्ने निर्णय गरेको छ ।
आईतबार बसेको बैठकले राजविराज नगरपालिकाभित्र निर्माणाधीन बसपार्क चैत १५ गतेभित्र सम्पन्न गर्नेगरी कार्य गर्ने निर्णय गरेको छ । यसको जिम्मेबारी लिन राजविराज नगरपालिकालाई अनुरोध गर्ने र अन्य कार्यालयहरुले आवश्यक समन्वय र सहजीकरण गर्ने निर्णय गरेको छ ।
राजविराज हटियाको पुनर्निर्माण गर्ने उद्देश्यले रु ३५ करोड ४८ लाख लागतमा २०७७ सालमा सम्पन्न हुने गरी २०७४ सालमै सहरी विकास मन्त्रालयले काम शुरु गराएको थियो । पटक–पटक म्याद थप्दा पनि ठेकेदार कम्पनी रसुवा रोशन जेभी जनकपुरले काम पूरा गर्न सकेको छैन ।
यस्तै, २०७४ सालमै सिनर्जी बिल्डर्स कुलेश्वर काठमाण्डौले रु १६ करोड ३८ लाखमा राजविराजको बसपार्क निर्माणको ठेक्का लिएर ७७ सालमै सक्नुपर्नेमा अझै सम्पन्न गर्न सकेको छैन् ।
यस्तै, जिल्लाभरी निर्माणाधीन सडक खण्डमा भएका खाल्डाखुल्डी पुरी अबिलम्ब सुचारु गर्ने निर्णय बैठकले गरेको छ ।
साथै सडक वस्तीका नागरिकहरुको बिरोध र वाधा सृजना हुन नदिन समयमै पानी हाल्ने, धूलो उड्न नदिने कार्य निरन्तर गर्न निर्माण कम्पनीलाई बैठकले निर्देशन दिएको छ ।
