राजविराज । नेपाली कांग्रेस, सप्तरीले राजविराज नगरपालिकामा भएको ताेडफाेडकाे छानबिन गर्दै दाेषीलाई कार्वाही गर्न माग गरेको छ ।
पार्टीका जिल्ला सचिव सनत मण्डलले शुक्रबार विज्ञप्ति जारी गर्दै नगरपालिकामा भएको तोडफोड घटनाको छानबिन गरि दोषिमाथी कानुनी कारवाहीका लागि स्थानीय प्रशासनसँग माग गरेका छन् ।
जेठ २७ गते नगरपालिका कार्यालयका कर्मचारीमाथी भएको कुटपिट र कार्यालयमा भएको तोडफोडका घटना अत्यन्त खेदपूर्ण रहेको जनउँदै विज्ञप्तिमा कुनै पनि विवादको समाधान वार्ता माध्यमबाट हुने बाटो रहँदा रहँदै पनि यस्तो खाले घटना हुनु अत्यन्त दुःखदायी भएको उल्लेख गरिएको छ ।
‘नेपालकै पुरानो मध्ये एक राजविराज नगरपालिका विगतको केही दिनदेखी पटक पटक विवादस्पद बन्दै गएको जगजाहेर नै छ’ विज्ञप्तिमा भनिएको छ, ‘ कार्यालयका कर्मचारी तथा जनप्रतिनिधिबीच पटक पटक यस्ता विवाद हुनुले सप्तरी जिल्लाको सदरमुकाम समेत रहेको राजविराजको साख पनि दाउमा परेको छ।’
सोही घटनाका कारण अहिले नगरपालिकाका कर्मचारीहरु पेन डाउन गरेर अत्यावश्यक कामकाज बाहेक सम्पूर्ण कामकाज ठप्प पारेकाले यस्ता घटनाका कारण उब्जेको परिस्थितले नगरपालिकाको मात्र नभएर सम्पूर्ण नगरवासीलाई सास्ती व्यहोर्नु परिरहेको विज्ञप्तिमा भनिएको छ ।
‘आर्थिक वर्षको अन्तिम क्षणमा नगरपालिकामा भएको यस्ता घटनाले नगरको विभिन्न विकासीय योजनाहरु, जनताको कामकाज लगायत अन्य सेवाहरु प्रभावित बन्न पुगेको छ’ विज्ञप्तिमा भनिएको छ, ‘तसर्थ विवाद समाधानका लागि आवश्यक पहल, कुटपिटमा परेका कर्मचारीहरुलाई न्याय तथा दाेषीलाई कार्वाही हुनुपर्छ ।’
