राजविराज । सघन शहरी तथा भवन निर्माण आयोजना, राजविराजले पटक–पटक समय लिएर पनि काम नगरेको भन्दै एक निर्माण कम्पनीसँग स्पष्टिकरण माग गरेको छ ।
कार्यालयका प्रमुख सुरेन्द्र साहले श्री डाँफे कान्छाराम देव एण्ड सायर जेभि निर्माण कम्पनीलाई स्पष्टिकरण सोधेका हुन् ।
संविभान सभा सदस्य एवं नेपाली कांग्रेसका युवा नेता रन्जित कर्णले ठेकेदार कम्पनीले काम नगरेको भन्दै सरकारी निकायमा दवाव बढाएका थिए । उनकै अगुवाईमा मंगलबार आयोजनाको कार्यालयमा बैठक बसेको थियो ।
बैठकले उक्त निर्माण कम्पनीले ठेक्का लिएको राजविराजको जनआन्दोलन चोकदेखि राम मन्दिरसम्म र मुुख्य बजारदेखि राजदेवी चोकसम्मको सडक एक साताभित्र निर्माण शुरु नगरिए ठेक्का रद्द गर्ने निर्णय गरेको छ ।
बैठक लगत्तै कार्यालय प्रमुख साहले निर्माण कम्पनीलाई पत्राचार गर्दै स्पष्टिकरण सोधेको छ ।
लिएको ठेक्काको निर्माण कार्य सुचारु नगरी यस कार्यालयको पटक–पटक ताकेता पत्रलाई समेत वेवास्ता गरिएको तथा यस कार्यालय र त्यस जेभिको प्रतिनिधीसँग बारम्बार लिखित तथा मौखिक म्यान्य्ट पनि भएको पत्रमा उल्लेख गरिएको छ ।
‘२०८२÷०२÷३० गते महानिर्देशक समेतको छलफलमा यथाशिघ्र निर्माण कार्यमा तिव्रता ल्याउन भनिएकोमा सो समेतलाई बेवास्ता गरी निर्माण कार्य शुरु नगरिएकोले तपाईलाई सार्वजनिक खरिद नियमावली, २०६४ को नियम १४१ बमोजिम कारवाही किन नगर्ने ? यसबारे ७ दिनभित्र स्पष्टीकरण पेश गर्न जानकारी गराईन्छ’ पत्रमा भनिएको छ ।
उक्त समयभित्र चित्त बुझ्दो जवाफ सहित निर्माण कार्य द्रूत गतिमा संचालन नगरिएमा यस आयोजनाको नाममा जारी भएको कार्य सम्पादन जमानत र अग्रिम जमानत झिकाई सम्झौतामा रहेको दफा तथा सार्वजनिक खरीद ऐन, २०६३ र सार्वजनिक खरीद नियमावली, २०६४ को नियम १४१ बमोजिम कारवाहीको प्रकृया समेत अघि बढाईने पत्रमा भनिएको छ ।
