दिपेश जोशी
राजविराज । सप्तरीको शम्भुनाथ नगरपालिकाले अस्पताल भवन निर्माणको काम अलपत्र पार्ने ठेकेदार कम्पनीलाई आर्थिक मिलेमतोमा रकम भुक्तानी गरेको खुलेको छ ।
नगरपालिकाको वडा नम्बर १० जमुवामा १५ शैय्याको नगर अस्पताल निर्माणका लागि ठेक्का लिएको एमबी टेक्नो जय शम्भो जेभी कम्पनीले काम लथालिङ्ग पारेपनि नगरपालिकाले गत जेठ पहिलो साता मिलोमतोमा १ करोड २५ लाख भुक्तानी दिएको पाइएको हो ।
अस्पताल निर्माण गर्न यसअघि नै नगरपालिकाले २०८१ साल असार १७ गते निर्माण कम्पनीसँग सम्झौता गरेको थियो । भ्याटसहित कुल २३ करोड ९ लाख ७५ हजार ८९५ रुपैयाँमा ठेक्का कबोल गरेको निर्माण कम्पनीले मोविलाइजेसन वापत यसअघि पनि १ करोड ८८ लाख भुक्तानी पाएका थिए । तर, कम्पनीले अहिले खाल्डो खनेर छड ओछ्याउने बाहेक कुनै काम नगरेको र काम अलपत्र पार्दा उक्त फलामे छडमा खिया लागिसकेको अवस्थामा कारबाही बढाउनुको साटो मिलेमतोमा नगरपालिकाले थप १ करोड २५ लाख रुपैयाँ ठेकेदारलाई भुक्तानी दिएका हुन् ।
वडा अध्यक्ष रमाकान्त मण्डलले भुक्तानी दिएको बारे आफूलाई कु्नै जानकारी नभएको बताए । ‘पछिल्लो तीन महिना यता कामै गरेको छैन्’ उनले भने, ‘काम गराउनुपर्ने ठाउँमा नगरपालिकाका कार्यबाहक मेयर अनिता चौधरी र प्रमुख प्रशासकीय अधिकृत हरिमोहन सुतिहार मिलेर भुक्तानी दिएका छन् ।’
अस्पताल भवनको काम शुरु गराउन आफूले पटक–पटक भन्दै आएपनि आफू समेतलाई कुनै जानकारी नदिएको उनको भनाई छ ।
यो भुक्तानी प्रकरणमा नगरपालिकाका कावा मेयर अनिता चौधरीका स्वकीय सचिव अनिल भगतले २५ लाख रुपैयाँ आर्थिक लाभ लिएको दावी गर्दै स्थानीय विभिन्न राजनीतिक दलका प्रतिनिधिहरुले छानबिनको माग समेत गरेका छन् । उनीहरुले गत ५ असारमा प्रमुख जिल्ला अधिकारी भोला दाहाललाई ज्ञापन पत्र बुझाउँदै छानबिन गरी दोषीमाथि कार्वाहीको माग गरेका छन् ।
नगरपालिकाका प्रमुख प्रशासकीय अधिकृत हरिमोहन सुतिहारले निर्माण कम्पनीको पहिलाकै मोविलाइजेसन वापतको रकम बाँकी रहेकाले भुक्तानी दिएको दाबी गरेका छन् ।
