राजविराज । गत जेठ २७ गते राजविराज नगरपालिकामा भएको घट्नामा निलम्बित र कावा मेयर दुवैको गल्ती देखिएको यहाँका राजनीतिक दलका नेताहरु बताएका छन् ।
शुक्रबार दिनभर जिल्ला प्रशासन कार्यालयमा बसेको सर्वदलीय बैठकले यस्तो ठहर गर्दै दुबैलाई आत्मालोचनासहित क्षमायाचना गराउने निर्णय गरेको छ ।
बैठकले राजविराज नगरपालिकाका लेखा प्रमुख शत्रुद्यन दाससहितका कर्मचारी उपर भएको कुटपिटप्रति दुःख व्यक्त गर्दै भर्त्सना गरेको छ । कुटपिटमा संलग्नवाट आत्मालोचना गराउँदै क्षमायाचना गराउने र आन्दोलनरत कर्मचारीलाई कामकाजमा फर्किन बैठकले आग्रह गरेको छ ।
‘कुटपिट गर्नेले सो नगरे कानुन बमोजिम कार्वाही गराउन प्रकृया अघि बढाउँदा राजनीतिक दलहरुले कुनै रोकछेक गर्नेछैन्’ निर्णयमा भनिएको छ, ‘साथै मूल्यांकन गरी उचित क्षतिपूर्ती उपलब्ध गराउन राजविराज नगरपालिकालाई आग्रह गर्दछ ।’
सार्वजनिक निकायबाट भए गरेका काम कार्वाहीप्रतिको असहमति वा अन्य कुनै विषयमा हुने विरोधका कार्यक्रमका नाममा रष्ट्रिसेवक कर्मचारीमाथि हातपात भएमा जिल्ला प्रहरी कार्यालयले कानुनी कार्वाहीको प्रकृया अघि बढाउँदा जिल्लास्थित राजनीतिक दलका तर्फबाट कुनै पनि बाधा नपुऱ्याउने निर्णय समेत गरिएको छ ।
