राजविराज । हामी आ–आफ्ना सन्तानलाई सानैदेखि मोवाइलको लत लगाइरहेका हुन्छौं । तर ती मोवाइलले कतिको फाइदा गराइरहेको छ ? भन्ने कुराको आँकलन हामीले गर्न सकेका हुँदैनौं ।
आफ्नो जिम्मेवारीबाट पन्छिन हामी आफ्ना कलिला सन्तानलाई मोवाइल दिदैं आएपनि त्यसबाट उत्पन्न हुने परिणामबारे कुनै खोजीनीति गर्दैनौं । जसका कारण बालकालिका सिधै नकारात्मक बाटोमा गइरहेका छन् ।
मोवाइल पाएर सानै उमेरमा ‘लभ’ पर्नेदेखि लिएर पोर्नोग्राफी हेर्ने लत लागिरहेको छ । सप्तरीमा एउटा यस्तै घटना भएको छ । मोवाइल पाएकी दुई जना बालिका गाउँ नजिककै दुई जना केटासँग ‘लभ’ गर्छन् । केटासँगै भागेर भारतको राजधानी दिल्लीसम्म पुग्छन् । तर, प्रहरी र भारतीय संस्थासँगको समन्वयमा बल्ल फेला पर्छन् ।
मोवाइलमा टिकटक आइडी बनाएकी दुबै बालिकाको उमेर १६ वर्षको छ । टिकटक आइडीबाटै युवकसँग लभमा परेका उनीहरु यति मोहित भए कि ती युवकसँग भागेरै दिल्ली पुगे ।
गत भदौको पहिलो साता हनुमाननगर कंकालिनी नगरपालिका वडा नम्बर ८ की यी दुबै बालिका वेपत्ता भइन् । परिवारजनले ११ भदौमा खोजलाश गरिपाउँ भनी प्रहरीमा हुलिया निवेदन दिए ।
सप्तरी प्रहरीका प्रवक्ता एवं डीएसपी हेमराज घिमिरे भन्छन्, ‘यसपछि हामी खोजलाश शुरु गर्यौं । त्यस क्रममा उनीहरु दिल्ली पुगेका रहेछन् ।’
दिल्लीस्थित किङ इण्डिया नामक संस्थासँग समन्वय गरी दुबै बालिकालाई घर फिर्ता ल्याइएको छ । ‘ती संस्थाका प्रतिनिधीले दिल्लीस्थित रेल्वे स्टेशनमै शंका लागेर बालिकासँग सोधपुछ गरेका थिए’ डीएसपी घिमिरेले इग्रीन मधेशसँग भने, बालिकालाई लगेका युवकहरु त्यहींबाट फरार भए ।’
भेटिएकी बालिकाले टिकटक मार्फत् ‘लभ’ परेर युवकहरुसँग गएको प्रतिकृया दिएको प्रहरीको भनाई छ ।
आईतबार संस्थाका निर्देशक नवीन जोशीले ती दुबै बालिकालाई जिल्ला प्रहरी कार्यालयको जिम्मा लगाएपछि अभिभावकलाई बोलाएर जिम्मा लगाइएको प्रहरीले जनाएको छ ।
मोवाइलले एक किसिमको विकृति पनि ल्याएको यो घटनाले देखिएको छ । बालबालिकालाई मोवाइल दिनुभन्दा किताव अध्ययन गर्ने या खेलकुदको बानी लगाउनुपर्ने आवश्यक्ता देखिएको छ ।
