राजविराज । सप्तरी जिल्ला बार एकाईका पदाधिकारीले व्यापक अनियमितता गरेको आरोप लागेको छ ।
एकाईका पूर्व अध्यक्ष एवं सदस्यहरुले आज पत्रकार सम्मेलन गरी यस्तो आरोप लगाएका हुन् ।
एकाईका अध्यक्ष एवं पदाधिकारीले लेखापढी व्यवसायीको प्रमाण पत्र लिन चाहने परीक्षार्थीहरुले बुझाएको रकममा अनियमितता गरेको उनीहरुको भनाई छ ।
एक हजार ८० जना परीक्षार्थीले आवेदन दिएकोमा ६७० जनाको मात्रै देखाई अन्य शुल्कको हिसाब नदेखाइएको पूर्व अध्यक्ष रामप्रसाद चौधरीले बताए । ‘प्रति परीक्षार्थी रु ५ हजारका दरले लिइएको रहेछ’ उनले भने, ‘बैंक मौज्दातमा ४१० जनाको रकम कतै दाखिला गरेको पाइएको छैन् ।’
यो हिसाबले २० लाख अनियमितता एकाईका अध्यक्ष एवं पदाधिकारीले गरेको देखिएको पत्रकार सम्मेलनमा उनीहरुको दाबी थियो ।
यस्तै, जेनजी आन्दोलनका क्रममा बारको कार्यालयमा कुनै क्षति नभएपनि अध्यक्ष, सचिव र कोषाध्यक्षले त्यसैलाई बहाना बनाएर ल्यापटप लगेको जानकारी दिइयो ।
साधारण सभाबाट गत जेठ २९ गते पूर्व अध्यक्ष अधिबक्ता रामकुमार यादवको संयोजकत्वमा गठित ५ सदस्यीय छानबिन समितिले कोषाध्यक्षको प्रतिवेदन उपर जाँच गर्दा व्यापक अनयिमतता देखिएको पत्रकार सम्मेलनमा वितरित प्रेस विज्ञप्तीमा उल्लेख छ । ‘यसपछि कागजात, बैंक स्टेटमेन्ट माग गरेपछि पदाधिकारीले आनाकानी गर्दा संयोजक पदबाट यादवले राजीनामा नै दिए’ विज्ञप्तीमा उल्लेख छ ।
यसपछि अर्का पूर्व अध्यक्ष रामप्रसाद यादवको संयोजकत्वमा गठन भएको अर्को छानबिन समितिले कोषाध्यक्षले फर्जी बिल भर्पाई बनाएको, अधिकांस बिलका भुक्तानीहरु बैंक स्टेटमेन्टसँग मेल नखाएको, लाखौं लाखमा खरीद गरेको सामानको भ्याट बिल नभएको, आम्दानी खर्चमा एकरुपता नदेखिएको र मनोमानी बिना निर्णयको खर्च गरेको देखिएको विज्ञप्तीमा उल्लेख छ ।
बनेका छानबिन समितिहरुलाई कागजात उपलब्ध नगराएको, गत असार ५ गते निवेदन मार्फत् सूचना माग्दा पनि नदिएको उनीहरुको भनाई छ । सूचना नदिँदा असार १७ गते बारको कार्यालयमा तालाबन्दी समेत गरेका थियौं’ विज्ञप्तीमा भनिएको छ, ‘सम्पूर्ण कागजातको प्रमाणित नक्कल दिन्छु भनेर सहमति गरेपनि दिइएको छैन् ।’
बारका अध्यक्ष कामेश्वर यादव, सचिव रामएकबाल मण्डल, कोषाध्यक्ष निलम कुमारी यादवले गरेको अनियमितता सम्बन्धमा आवाज उठाउँदा षडयन्त्रपूर्वक पूर्व अध्यक्ष रामप्रसाद चौधरी, पूर्व कोषाध्यक्ष शिबनाथ साह, अध्यक्षका प्रत्यासी उपेन्द्र यादवलाई सदस्यता खारेज गर्ने धम्की दिएको पत्रकार सम्मेलनमा जानकारी दिइयो ।
आर्थिक अनियमितताबारे नेपाल बारलाई समेत जानकारी गराइएपनि ध्यान नदिएको उनीहरुको गुनासो छ ।
गत भदौ १६ गते ३२ जना सदस्य हस्ताक्षर गरी अध्यक्षसहितका पदाधिकारीविरुद्ध अविश्वासको प्रस्ताव दर्ता गर्न उपाध्यक्ष मिस्टर चौधरीलाई निवेदन दिँदा पनि उपाध्यक्ष चौधरीले पत्र गोजीमै राखेको उनीहरुको भनाई छ ।
सप्तरी जिल्ला बारमा भएको अनियमितताको अबिलम्ब छानबिन गरी दोषीमाथि कार्वाही गर्न उनीहरुले माग गरेका छन् ।
