राजविराज । सत्तारुढ राष्ट्रिय स्वतन्त्र पार्टी (रास्वपा) का सांसद अंकिता ठाकुरले रामराजा सिंह स्वास्थ्य विज्ञान प्रतिष्ठानको विधेयकलाई व्यवहारिक, सर्वसमावेशी र दिर्घकालिन रुपमा बलियो बनाउनुपर्ने बताएकी छन् ।
प्रतिनिधी सभामा मंगलबार विधेयक उपरको छलफलका क्रममा बोल्दै उनले यस्तो बताएकी हुन् ।
उनले विधेयकको दफा १९ को उपदफा ३ को खण्ड क मा रहेका केही प्रावधानहरुमा थप सुधार गर्नुपर्ने आवश्यक्ता औंल्याएकी छन् ।
‘विद्यमान दफा १९ को उपदफा ३ क मा कुलपति वा सो सरहको पदका लागि चिकित्सा शिक्षामा स्नातक गरी कम्तीमा पाँच बर्ष प्रध्यापक पदमा काम गरेको हुनुपर्ने संकुचित प्रावधान छ’ उनले भनिन्, ‘यो व्यवस्था अन्य विश्वविद्यालय तथा स्वास्थ्य विज्ञान प्रतिष्ठानको तुलनामा संकुचित छ ।’
मधेश प्रदेशको विद्यमान यथार्थलाई हेर्दा प्राध्यापक तथा वरिष्ठ चिकित्सकहरुको संख्या एकदमै सिमित रहेको र यसका संकुचित मापदण्ड कायम राख्दा योग्य व्यक्ति नपाएर उपकुलपतिसहिकता महत्वपूर्ण पद रिक्त रहने र प्रतिष्ठानको सञ्चालन नै प्रभावित हुने गम्भीर जोखिम रहेको सांसद ठाकुरले बताइन् ।
‘त्यसैले मान्यता प्राप्त विश्वविद्यालय र शिक्षण संस्थाबाट चिकित्सा शास्त्रमा कम्तीमा स्नातकोत्तर तहको उपाधि पाएका र कुनै पनि स्वास्थ्य संस्थान, प्रतिष्ठान, विश्वविद्यालय वा अस्पताल, स्वास्थ्य सम्बन्धी प्राज्ञिक संस्थामा कम्तीमा १० वर्षको अनुभव हासिल गरेका तथा प्राध्यापक पदमा कार्य गरेका वा स्वास्थ्य सेवाको १० औं तह वा सोभन्दा माथिको पदमा कार्य गरेका र कम्तीमा ५ वर्षको प्राध्यापन अनुभव भएका दक्ष चिकित्सकलाई पनि समेटने गरी दायरा फराकिलो बनाउनुपर्छ’ उनले भनिन् ।
सप्तरीको गजेन्द्रनारायण सिंह अस्पतालमा १० औं तहका मेसु बस्ने गरेको र ११औं तहको जानै नमानिरहेको उल्लेख गर्दै उनले यदी रामराजा स्वास्थ्य विज्ञान प्रतिष्ठानमा त्यस्तै व्यवस्था गरेमा पदहरु खाली रहने बताइन् ।
उनले अगाडि भनिन्, ‘यदी हामीले स्वास्थ्य विज्ञान विश्वविद्यालय शिक्षण अस्पताल र प्राज्ञिक क्षेत्रका अनुभव हासिल गरेका थप योग्य व्यक्तिहरुलाई अवसर दियौं भने रामराजा प्रसाद सिंह स्वास्थ्य विज्ञान प्रतिष्ठान पारदर्शी दिर्घकालिन रुपमा बलियो बनाउन ठूलो मद्दत पुग्छ ।’
धेरै वर्षदेखि रोकिएर बसेका रामराजा स्वास्थ्य विज्ञान प्रतिष्ठान सम्बन्धी विधेयक २०८३ ल्याउन स्वास्थ्य तथा खाद्य स्वच्छता मन्त्रालयले जुन पहल गरेको छ त्यसका लागि मन्त्रालय र नेपाल सरकारलाई विशेष धन्यवाद दिदैं उनले यस प्रतिष्ठानको निर्माण र ऐनको निर्माणले समग्र सप्तरी मात्र नभई मधेश प्रदेशमै स्वास्थ्य र चिकित्सा क्षेत्रमा ऐतिहमासिक क्रान्ति ल्याउने विश्वास व्यक्त गरिन् ।
