राजविराज । जनता समाजवादी पार्टी (जसपा) नेपालका अध्यक्ष उपेन्द्र यादवले मधेश संकटग्रस्त अवस्थामा रहँदा प्रधानमन्त्रीले हेलिकप्टरमा घुमेर केही नहुने बताएका छन् ।
जनता समाजवादी पार्टी (जसपा) नेपाल, सप्तरीको एकताको प्रथम जिल्ला अधिवेशनलाई बुधबार राजविराजमा उद्घाटन गर्दै यादवले यस्तो बताएका हुन् ।
अन्नदाता त्राहिमाम अवस्थामा रहेको, खेतमा धुलो उडिरहेको, साउन महिनामै ४०० फिट तलसम्म पानी पाउन नसकिरहेको उल्लेख गर्दै उनले भने, ‘अरु मौसममा अवस्था कस्तो होला ?’
यादवले चुरे क्षेत्रलाई सरकारले राजमार्ग बनाएको र बसोबासको नाममा अतिक्रमण गरेका कारण यस्तो समस्या सृजित भएको बताए । ‘यसले पानीको सतह तल झर्दै गयो र मधेश मरुभूमि बन्यो’ पूर्व उपप्रधानमन्त्री समेत रहेका उनले भने ।
सरकारको गलत नीति र योजनाले देशमा जल संकटको स्थिति उत्पन्न भएको भन्दै उनले युनेस्कोले पनि धेरै पटक चुरेलाई जोगाउन भनिसकेको र यसलाई बचाउन अरबौको सहयोग आएपनि गलत नीतिले काम हुन नसकेको बताए ।
यादवले देशमा पर्याप्त नदीनाला भएको उल्लेख गर्दै त्यहीं नदीनालाबाट सिंचाइ पुर्याउन सकिने बताए । ‘यसका लागि बजेट संशोधन गर्नु जरुरी छ ।’
जल संकटको स्थायी समाधान खोज्न नसकिए देश हितको सरकार कहलाउन नसकिने भन्दै उनले बजेट संशोधन गरी सारा शक्ति यसमै खर्चिन सुझाव दिए । ‘अन्तर्राष्ट्रिय सहयोग समेत लिएर यसको समाधान अबिलम्ब खोज्नुपर्छ’ उनले भने ।
नदी नभएको ठाउँमा पनि राम्रो खेती भइरहेको उल्लेख गर्दै उनले बर्षाको पानी संकलन गरी धेरै ठाउँँमा खानेपानी र खेतीका लागि प्रयोग भइरहेको बताए । ‘त्यसरी नै यहाँ पनि गर्न सकिन्छ’ उनले भने, ‘सरकार यसतर्फ गम्भीर बन्नु जरुरी छ ।’
