राजविराज । उच्च अदालत जनकपुर, राजविराज इजलासका मुख्य न्यायाधीश बामदेव ज्ञवालीले समाजमा जातीय विभेदको ठूलो खाडल रहेको बताएका छन् ।
बैध-प्रकाश मानवअधिकार पुरस्कार कोषले ३३ औं प्रकाश स्मृति दिवसको अवसरमा शुक्रबार राजविराजमा आयोजना गरेको पुरस्कार बितरण कार्यक्रमलाई सम्बाेधन गर्दै उनले यस्तो बताएका हुन ।
‘जातीय विभेदको ठूलो खाडल छ’ उनले भने, ‘अन्तर्जातीय महिला पुरुषले विवाह गरे अनेकौं गैर कानुनी क्रियाकलाप गर्ने गरिन्छ ।’
उमेर पुगेका छोरा छोरीले अन्तर्जातीय विवाह गर्दा सम्बन्ध राम्रो बनाउनुतर्फ ध्यान दिन उनके सुझाव दिए ।’छोरीले अन्तर्जातीय युवकसँग विवाह गर्दा अपहरणको मुद्दा चलाउने गरिन्छ, उनले भने, ‘सम्बन्ध राम्रो बनाउनुको सट्टा अपराधी बनाउने गरिन्छ ।’
राजविराजको आफ्नै गरिमा पहिचान छ भएपनि यहाँको शैक्षिक चेतना र मानवअधिकारका कुरा ओझेलमा परेको देखिएको उनलेे बताए ।
इन्सेकका पूर्व अध्यक्ष सुबोधराज प्याकुरेलले मानवअधिकार एउटा दर्शनको रुपमा स्थापित भएको बताए । हरेक राजनीतिक सिद्धान्तले मानवअधिकारको सिद्धान्तलाई अंगिकार गरेको बताए ।
आफ्नो संस्कृति र संसकार बिर्सिदै गएको, अपहेलना गर्दै गएको भन्दै उनले चिन्ता व्यक्त गरे ।
बैध-प्रकाश मानवअधिकार पुरस्कार-२०८२ बाट वरिष्ठ अधिवक्ता हिम्मत सिंह पुरस्कृत भएका छन् ।
सोही अवसरमा उर्मिला देवी झा छैठौं मैथिली गीत गायन पुरस्कार-२०८२ बाट राजविराज-१६ बोरियाकी रुपा देवलाई प्रदान गरियो ।
सिंहलाई इन्सेकका पुर्व अध्यक्ष सुबोधराज प्याकुरेल र देवलाई उच्च अदालत जनकपुर, राजविराज इजलासका मुख्य न्यायाधीश बामदेव ज्ञवालीले प्रदान गरे ।
सिंहलाई रु १२ हजार नगदसहित र देवलाई नगद रु २ हजार ५०० सहित सम्मान पत्र र दोसल्ला ओढाएर सम्मानित गरियो ।
पुरस्कारका संस्थापक बैद्यनाथ झाको अध्यक्षतामा आयोजित कार्यक्रममा पुरस्कृत सिंह, प्रमुख जिल्ला अधिकारी भोला दाहाल, नेपाल पत्रकार महासंघ, सप्तरीका अध्यक्ष श्रवण कुमार देव, नागरिक समाजका अध्यक्ष थानसिंह भन्सालीसहितकाले बोलेका थिए ।
