राजविराज । सप्तरीको राजगढ गाउँपालिका वडा नम्बर २ मा प्रहरी र स्थानीयबीच मध्यरातमा झड्प भएको छ ।
मदिरा भारततर्फ तस्करी भइरहेको सूचनाको आधारमा पुगेको प्रहरी टोलीमाथि स्थानीयले एक्कासी ढुँगामुडा गर्न थालेपछि प्रहरीले गोली चलाएको छ । गोली लागेर स्थानीय एक व्यक्तिको मृत्यु भएको छ ।
मृत्यु हुनेमा स्थानीय लालु यादव छन् । प्रहरीको गोली लागेर घाइते भएका अन्दाजी ३७ बर्षीय यादवको उपचारका क्रममा गजेन्द्रनारायण सिंह अस्पताल, राजविराजमा मृत्यु भएको छ ।
स्थानीयहरुले एक्कासी ढुँगा हान्न थालेपछि प्रहरीले केहि राउण्ड गोली चलाएको र त्यस क्रममा याादवको तिघ्रामा गोली लागेको सप्तरी प्रहरीका प्रबक्ता एवं डीएसपी जितेन्द्र कुमार बस्नेतले जानकारी दिए ।
उनका अनुसार उक्त ठाउँबाट भारततर्फ तस्करी गर्न लागिएको मदिराहरु समेत नियन्त्रणमा लिइएको छ ।
एकसाताअघि प्रहरीले यहीं ठाउँबाट ठूलो परिमाणमा तस्करी गर्न राखिएको मदिरा बरामद गरेको थियो ।
