राजविराज । सप्तरी क्षेत्र नम्बर–४ मा अगामी २१ फागुनमा हुन लागेको प्रतिनिधि सभा चुनाव लक्षित नेपाली कांग्रेस बोदेबरसाईन नगरपालिकाको नगरस्तरीय कार्यकर्ता भेला तथा पार्टी प्रवेश कार्यक्रम सम्पन्न भएको छ ।
वडा नम्बर–५ स्थित धर्मशालामा आयोजना गरिएको कार्यक्रममा बोदेबरसाईन नगरपालिका वडा नम्बर–७ का शिवन्दन यादव जनता समाजवादी पार्टी (जसपा) नेपाल परित्याग गरी नेपाली कांग्रेसमा प्रवेश गरेका छन् । यादव यसअघि जसपाबाट वडा नम्बर–७ मा २०७४ र २०७९ सालको स्थानीय तह निर्वाचनमा वडा अध्यक्ष पदमा प्रतिस्पर्धा गरेका थिए र दुवै पटक झिनो मतान्तरले पराजित भएका थिए । उनीसँगै उनका केही समर्थकहरू समेत कांग्रेसमा प्रवेश गरेका छन् ।
नवप्रवेशीहरूलाई प्रतिनिधि सभा निर्वाचन क्षेत्र नम्बर–४ का नेपाली कांग्रेसका प्रतिनिधि सभा सदस्य उम्मेदवार तथा पूर्वमन्त्री तेजुलाल चौधरी र नगर सभापति इन्जिनियर दिपेन्द्र यादवले पार्टीमा स्वागत गरेका थिए ।
यस्तै, वडा नम्बर–१० का किशोर कुमार यादव नेकपा परित्याग गर्दै नेपाली कांग्रेसमा प्रवेश गरेका छन् । उनको नेतृत्वमा दिलिप कुमार यादव, रूपेश यादव, रविन्द्र यादव, रामा दास, चन्द्र नारायण यादव लगायत १८ जना कांग्रेसमा आवद्ध भएका छन् ।
त्यसैगरी, वडा नम्बर–६ का ब्रहमदेव महतोले नेकपा एमाले परित्याग गरी नेपाली कांग्रेसमा प्रवेश गरेका छन् ।
उक्त कार्यकर्ता भेलालाई सम्बोधन गर्दै उम्मेदवार पूर्व मन्त्री तेजुलाल चौधरीले मधेश प्रदेशमा व्याप्त रहेको मिटर ब्याज (सूदखोरी) को समस्या आफूले सशक्त रूपमा संसदमा उठाएको उल्लेख गरे । उनले पीडित जनताको पक्षमा निरन्तर आवाज उठाइरहेको दाबी गर्दै अब यसलाई समाधानको चरणमा लैजान पहल गर्ने प्रतिबद्धता व्यक्त गरे ।
चौधरीले आफ्नो कार्यकालमा क्षेत्रमा सडक पूर्वाधारतर्फ कल्याणपुर – गाईघाट सडक , कल्याणपुर –फुलबारीया– बनौली सडक र कदमहा – प्रमाणपुर– पटेर्वा सडक यस्तै कुसहा बेल्ही सडकमा रकम विनियोजन भई केही सडक निर्माण कार्य अन्तिम चरणमा रेहेको कुसहा बेल्ही सडकको काम तिव्र रूपमा भई रहेको बताए ।
नयाँ सडक विस्तारका कामहरू सुरु भएको उल्लेख गर्दै उनले विकास निरन्तरता लागि आफूलाई पुनः विजयी गराउन आग्रह गरे ।
कार्यक्रममा वक्ताहरूले कांग्रेसलाई सशक्त बनाउन सबै कार्यकर्ता एकजुट भएर चुनावी अभियानमा लाग्नुपर्नेमा जोड दिएका थिए ।
