राजविराज । नेकपा एमालेका नेता जितेन्द्र नारायण देवले पार्टी परित्याग गरेका छन् ।
सोमबार राजविराजस्थित नेपाल पत्रकार महासंघ, सप्तरीको कार्यालयमा पत्रकार सम्मेलन गर्दै उनले पार्टी परित्यागको घोषणा गरेका हुन् ।
एमालेबाटै नेपाली काङ्ग्रेसमा प्रवेश गरेका उनी काङ्ग्रेसबाटै राष्ट्रिय सभा सदस्य एवं संस्कृति, पर्यटन र नागरिक उड्डयन मन्त्री बनेका थिए ।
केही दिनअघि उनी पुनः एमाले प्रवेश गरेका थिए ।
पत्रकार सम्मेलनमा उनले पार्टीलाई ब्यक्तिवाद् र देवत्वकरण तिर लैजाने तथा स्वेच्छाचारी र विभेदकारी ढंगले पार्टी संचालन गर्ने बिचार नीति तथा ब्यबहारसँग असहमत भएर पार्टी परित्याग गरेको बताए ।
‘बिगत लामो समय देखि देशमा बिद्यमान कुशासन, भ्रष्टाचार, लुटतन्त्र, बेरोजगारी तथा युवाहरुको आम बिदेश पलायनको बिरूद्धमा आक्रोशको बिष्फोट थियो भदौ २३ गतेको जेन जी बिद्रोह’ पत्रकार सम्मेलनमा बितरित प्रेस विज्ञप्तिमा भनिएको छ, ‘यसलाई यसै रूपमा नबुझी वा बुझ्न नचाही आफु सच्चिन र पार्टीलाई सच्चाउने दिशामा लाग्नुको सट्टा यसलाई ‘बिदेशी षड्यन्त्र’ देख्ने, पार्टीलाई ब्यक्तिवाद् र देवत्वकरण तिर लैजाने तथा स्वेच्छाचारी र विभेदकारी ढंगले पार्टी संचालन गर्ने बिचार नीति तथा ब्यबहार सगं असहमत भई आजैको मितिदेखि नेकपा (एमाले) परित्याग गरेको घोषणा गरेको छु ।’
