राजविराज । सप्तरी क्षेत्र नम्बर २ का प्रतिनिधी सभा उम्मेदार डा. शरदसिंह यादवले ११ बुँदे प्रतिबद्धता पत्र सार्वजनिक गरेका छन् ।
मंगलबार राजविराजस्थित नेपाल पत्रकार महासंघको कार्यालयमा पत्रकार सम्मेलन गरी यादवले प्रतिबद्धता पत्र सार्वजनिक गरेका हुन् ।
आफू यहीं क्षेत्रको बासिन्दा भएको र यहाँको राजनीति र विकासीय कामको सुस्ता हेरेर दिक्क भएर उम्मेदवारी दिएको जन अधिकार पार्टीका अध्यक्ष समेत रहेका उनले बताए ।
‘यो क्षेत्रका लागि केही गर्न सकुँ भन्ने हुटहुटी पलाएर नै म उम्मेवार बनेको हुँ’ उनले भनेका छन्, ‘आफू निर्वाचित भएमा यो प्रतिबद्धता जसरी पनि पूरा गर्छु ।’
सप्तरीको एक मात्र सरकारी अस्पताल गजेन्द्रनारायण सिंह अस्पताल, राजविराज रेफरल सेन्टरको रुपमा परिचित रहेकाले यो अस्पतालमा सबैको, सबै रोगको उपचार गराउने किसिमले तयार पार्ने, महेन्द्र बिन्देश्वरी बहुमुखी क्याम्पसको अध्ययन/अध्यापनलाई निरन्तरतासहित राम्रो बनाउने, छिन्नमस्ता गाउँपालिकास्थित देशकै प्रसिद्ध सखडा भगवती मन्दिरलाई प्रमुख धार्मिक पर्यटकीय क्षेत्रको रुपमा परिणत गराउने, राजविराजदेखि कुनौलीसम्मको सडक निर्माणदेखि दुबै देशबीचको व्यापारिक अवस्थालाई अझ राम्रो बनाउने उनले प्रतिबद्धता जनाएका छन् ।
यस्तै, यो क्षेत्रमा लागूऔषध मन्दबिष झैं फैलिरहेकाले यसबिरुद्ध काम गर्दै युवाहरुलाई लागूऔषधमुक्त गराउन भूमिका निर्वाह गर्ने, तिलाठी कोइलाडी गाउँपालिकामा बाढीको नियन्त्रणका लागि पहल गर्ने, क्षेत्रभित्रका लिंक रोडहरु मर्मत सम्भार एवं निर्माणका लागि पहल गर्ने, क्षेत्रभित्रका सामुदायिक विद्यालयहरुमा गुणस्तरीय शिक्षाका लागि पहल गर्दै विद्यालय शान्ति क्षेत्र कार्यान्वयन गराउने, क्षेत्रभित्रका किसानलाई मलखाद्यको अभाव नहोस् त्यसका लागि तत्पर रहने, क्षेत्रभित्रका सबै पालिकामा पुस्तकालय स्थापना गर्ने र राजविराज विमानस्थलबाट दैनिक दुई उडानका लागि पहल गर्ने प्रतिबद्धता उनले गरेका छन् ।
‘प्रजातन्त्र ल्याउने सवालमा होस् या लोकतन्त्र र संघीय लोकतान्त्रिक गणतन्त्र, यी सबै आन्दोलनमा सप्तरीको भूमिका अपरिहार्य छ । तथापी पनि सप्तरी जिल्ला सोंचे भन्दा अघि बढ्न सकेको छैन् । विकासीय पथमा धेरै पछि छ’ पत्रकार सम्मेलनमा उनले भने, ‘देशकै पहिलो टाउन प्लानिङ्ग शहर राजविराज धेरै पछि छ । यो भन्दा धेरै कान्छो रहेको लहान, इटहरी, गाईघाटसहितका शहर यहाँभन्दा अघि बढिसकेको हामी समक्ष छर्लङ्ग छ ।’
राणा शाषणकाल र राजतन्त्रको समय मधेश बिरोधी भएपनि २०६३ सालपछि लगातार मधेशकै नेतृत्वले मौका पाएपनि यो क्षेत्र किन पछाडि पर्यो ? भन्दै उनले प्रश्न गरे ।
