राजविराज । गत आर्थिक बर्ष २०७८÷७९ मा बिभिन्न विकासीय काम गरेका सप्तरीको अग्निसाइर कृष्णासवरण गाउँपालिकाका उपभोक्ता समितिले हालसम्म भुक्तानी पाउन सकेका छैनन् ।
भुक्तानी दिन गाउँपालिकाकाले आलटाल गरेको भन्दै उपभोक्ता समितिका पदाधिकारीहरुले बिहीबार गाउँपालिका कार्यालयको मूलगेटमा ताला लगाएका छन् । तर ताला लगाएको केहि बेरमै पुगेका गाउँपालिका उपाध्यक्ष कल्पना चौधरीले दशैं अगाबै भुक्तानी गर्ने प्रतिबद्धता जनाएकी छन् । उनको प्रतिबद्धतापछि ताला खोलिएको उपभोक्ता समितिका पदाधिकारीहरुले बताएका छन् ।
उपभोक्ता समितिका पदाधिकारीहरुका अनुसार समयमै काम सम्पन्न गरेको भएपनि गाउँपालिका अध्यक्षले नै भुक्तानी दिन नमानेको बताए । गाउँपालिकाको वडा नम्बर ३ स्थित शिवालय पार्क उपभोक्ता समिति अध्यक्ष राजेश कुमार चौधरीले आफू निर्माण गरेको काम वापत रु १५ लाख लिन बाँकी रहेको बताए ।
५७ वटा उपभोक्ता समितिलाई भुक्तानी नदिइएको चौधरीले बताए । उपभोक्ता समितिका पदाधिकारीहरुले तोकिएको समयमा भुक्तानी नदिए आन्दोलनलाई निरन्तरता दिने बताएका छन् ।
