राज्यको नीति, नियम सबैलाई मान्नुपर्छ । राज्यले बनाएको कानुनभन्दा बाहिर कसैलाई जानु हुँदैन् । तर, नीति, नियम मानिरहँदा राज्यले पनि आफ्ना नागरिकका लागि केहि गर्नुपर्ने दायित्व हुन्छ । तर, राज्यले यस किसिमको दायित्व अहिले निर्वाह गरिरहेको छैन् । अहिले देशमा आर्थिक संकट आउन लाग्दा पनि राज्यको भूमिका मौन देखिएको छ । यसबारे राज्यले गम्भीरता देखाउन सकेको छैन् । सबैभन्दा बढी समस्या व्यापार, व्यवसाय चौपट हुन लागेको छ । व्यवसायीले सरकारले निर्धारण गरेको कर तिर्दै आएका छन् । तर बैंकले अकस्तमात दोब्बर व्याज दर बनाउँदा पनि सरकार मौनको अवस्थामा छ ।
शनिबार राजविराजमा सप्तरी उद्योग बाणिज्य संघले आयोजना गरेको एक कार्यक्रममा व्यवसायीले राज्यलाई कर तिर्दै आएपनि बैंकले एक्कासी व्याज दर दोब्बर बनाउँदा पनि राज्य गम्भीर बन्न नसकेको बताए । यति पीडाबाहेक सप्तरीका व्यवसायीले अर्काे पीडा पनि व्यक्त गरे । उनीहरुले कर र बैंक व्याज तिर्न पनि समस्या भइरहेको सुनाए । कारण यहाँको व्यापार, व्यवसाय चौपट बनेको छ । खुल्ला सिमानाका कारण भारतबाट चोरी, तस्करी गरी सामान ल्याइरहेका कारण व्यवसाय चल्न नसकेको उनीहरुको गुनासो थियो ।
राज्यलाई कर तिरेपछि राज्यले यस्ता चोरी, तस्करी नियन्त्रण गरिदिनुपर्ने हो । चोरी तस्करीका कारण राज्यलाई नै घाटा भइरहेको अवस्था छ । राजस्व संकलन अत्यधिक घट्न थालेको छ । आखिर चोरी, तस्करीलाई प्रश्रय दिनुको मतलव के हो ? यस्तो कार्य खुल्ला गरेर कसले फाइ्दा लिइरहेका छन् ? राज्यलाई गम्भीर बन्नु जरुरी छ ।
