राजविराज । जनमत पार्टीका अध्यक्ष डा. सीके राउतले विवाह र भोजभतेरको उदाहरणलाई विकाससँग विश्लेषण गर्दै मंगलबार प्रतिनिधीसभामा आफ्नो धारणा राखेका छन् ।
सरकारले प्रस्तुत गरेको विनियोजन विधेयकका सिद्धान्त र प्राथमिकतामाथि भइरहेको छलफलमा बोल्दै सप्तरी–२ का प्रतिनिधी सभा सदस्य रहेका राउतले विकास भनेकै ठूला भवन, फराकिला सडक र विमानस्थल भनेर बुझ्न नहुने बताए । उनले यसरी नै बुझ्दा अर्थतन्त्रको हविगत भएको सुनाए ।
विवाहमा दुल्हादुल्हीको मन हेर्नुपर्नेमा हामी भोजभतेरतिर लागेजस्तै अहिलेको विकास भएको उनको भनाई छ । ‘विवाहमा दुल्हा दुल्हीको मन मिलेको हेर्नुपर्छ, तर हामी ठूलो तामझाम गर्छौं’ उनले भने, ‘ऋणै गरेर भएपनि सुन किन्छौं । भोजभतेर गर्छौं । हाम्रो अर्थतन्त्र पनि यस्तै भएको छ ।’
सरकार ठूल्ठूला भवन, चौडा सडक, विमानस्थललाई विकासको मानक मान्नु गलत रहेको बताउँदै उनले एयरट्राफिक नै नपुग्ने विमानस्थल निर्माण गरे पनि तलब नपाएर प्रहरीहरू रुनु परेको बताए । ‘हामीले एयर ट्राफिक नै नपुग्ने विमानस्थल बनाइरहेका छौं । तर प्रहरीले तलब नपाएर रुनु परेको छ । स्वास्थ्य सेवा दिन पाइरहेका छैनौं । तर डाँडाडाँडामा भ्युटावर बनाइरहेका छौं’ उनले थपे, ‘सडकमा प्रतिघन्टा सय वटा गाडी गुड्दैन । तर प्रत्येक सडक चार लेन र छ लेन बनाउनुपर्छ भनेर लहैलहैमा लागेका छौं ।’
उनले अर्थमन्त्रीलाई आगामी बजेट मानव केन्द्रित बनाउन आग्रह गरे । कोही पनि भोकै नहोस्, कोही पनि स्वास्थ्य सेवाबाट वञ्जित नहोस्, कोही पनि सामाजिक सुरक्षाबाट वञ्चित हुन नपरोस् त्यस किसिमको बजेट बनाउन उनले अर्थ मन्त्रीसँग आग्रह गरे ।
