राजविराज । जनमत पार्टीले मधेश कृषि विश्वविद्यालयलाई यो अवस्थासम्म ल्याई पु¥याउने उपकुलपति र रजिष्टार दोषी रहेको बताएका छन् ।
छानबिन समितिको प्रतिवेदनको सिफारिश अनुसार यी दुबै दोषी देखिएको र उनीहरुले राजीनामा नदिँदा समस्या भएको जनमत पार्टीको सचिवालयले जनाएको छ ।
मधेश प्रदेश सभाले मधेश कृषि विश्वविद्यालय सम्बन्धी छानबिन समिति बनाएर प्रतिवेदन पेश गरेको छ । जसअनुसार विश्वविद्यालयको बेथितिको लागि जिम्मेबार रहेका उपकुलपति डा. बैधनाथ महतो र रजिष्ट्रार डा. श्रीभगवान ठाकुरलाई बरखास्त गर्न सुझाएको जनमतले भनेको छ । तर शिक्षा मन्त्रीलाई लोसपा अध्यक्ष महन्थ ठाकुरले रजिष्ट्रार भगवान ठाकुरलाई कुनै पनि हालतमा बरखास्त गर्न नदिने अडान लिए पछि सबै कुरा अट्केर बसेको जनमतको सचिवालयले जनाएको छ ।
‘अहिले पनि विधान अनुसार बैंक खाता संचालनको पत्र मात्रै लेखेमा पनि आजका–आजै तलब खुवाउन सकिन्छ वा अन्य गतिविधि संचालन गर्न सकिन्छ’ जनमत पार्टीको सचिवालयले सामाजिक संजाल मार्फत् भनेको छ, ‘तर त्यसो नगरेर सबै राजनीतिकरण गर्ने खेल भइरहेको छ ।’
दोषी भ्रष्ट उपकुलपति र रजिष्टार अनि विरोध चाहिँ अरूको ? भन्दै प्रश्न समेत गरिएको छ ।
जसपाको तलबबाट चलेकाहरूले सोही अनुसार भ्रम फैलाइरहेको जनाउँदै उसले अनावश्यक रूपमा जनमत पार्टी वा अध्यक्ष सिके राउतलाई मुछेर बदनाम गर्ने षड्यन्त्र हुँदै आएको जनाएको छ ।
२०८० साल माघको शुरूदेखि नै जनमत पार्टी ७–बूँदे माग राखी, ज्ञापन पत्र बुझाउँदै, मधेश कृषि विश्वविद्यालयमा भएको भ्रष्टाचार, दलीयकरण, सिनेटको निर्णयबिना गरिएका गैरकानूनी काम, ठेकापट्टामा भएको चरम घोटाला र अनियमितताविरूद्ध आन्दोलन गर्दै आएको स्मरण गराइएको छ ।
