राजविराज । सप्तरीको खडक नगरपालिकाका प्रमुख जयप्रकाश चौधरी आफैं बोक्सी आफैं धामी बन्न प्रयास गरेका छन् ।
प्रमुख चौधरी मधेश प्रदेश स्वास्थ्य विज्ञान प्रयोगशालाबाट प्रदान गरिएको ल्याब उपकरण संचालन तथा व्यवस्थापन समितिका संरक्षक हुन् । समितिको अध्यक्ष वडा नम्बर ७ का अध्यक्ष राकेश कुमार साह तथा प्राथमिक स्वास्थ्य केन्द्रका कार्यालय प्रमुख सजन लाल साह सदस्य सचिब छन् ।
यो प्रयोगशालाको ल्याव उपकरण प्रयोगबाट प्राप्त हुने राजश्व रकम अनलाइन बिलिङ गरी नगरपालिकाको राजश्व खातामा जम्मा भैरहेकोमा गत साउन १ गतेदेखि अफलाइन बिलिङ बाट काम संचालन भइरहेको छ ।
अनलाइन हुने काम अफलाइन हुन थालेपछि संरक्षकसहित समितिका पदाधिकारीले ध्यान दिनुपर्ने हो । तर, चौधरीले यो बिषयमा कार्यालयका प्रमुख प्रशासकीय अधिकृतसँग स्पष्टिकरण सोधेका छन् । ‘ल्याब उपकरण प्रयोगबाट प्राथमिक स्वास्थ्य केन्द्रको राजस्व कहाँ कुन खातामा कति रकम जम्मा गरिएको हो भन्ने जानकारी तपाईलाई दिएको छ वा छैन ? जानकारी भएपछि कार्यवाही प्रक्रिया किन अगाडी बढाउनु भएन ? कि तपाईको मिलोमतोमा त्यो सरकारी राजस्व रकम जम्मा नगराई तपाईले हिनामिना गर्नुभएको हो ? २४ (चौवीस) घण्टा भित्र स्पष्टिकरण पेश गर्नु हुन जानकारीका लागि अनुरोध गरिन्छ’ चौधरीले सोधेको स्पष्टिकरणमा भनिएको छ ।
चौधरीले नगरपालिकाको फेसबुक पेज मार्फत स्पष्टिकरण सोधे लगत्तै प्रमु्ख प्रशासकीय अधिकृत बिनय कुमार सोनुले जनतामा प्रवाह हुने सेवा र राजश्व सम्बन्धी विषयवस्तुको सन्दर्भमा गठित संचालक तथा व्यवस्थापन समितिको संरक्षक नगर प्रमुख स्वयम् रहेको जवाफ प्रमुख चौधरीले सार्वजनिक रुपमै दिएका छन् ।
‘मधेश प्रदेश स्वास्थ्य विज्ञान प्रयोगशालाबाट प्रदान गरिएको ल्याब उपकरण संचालन तथा व्यवस्थापन समितिका संरक्षक प्रमुख चौधरी, समितिको अध्यक्ष वडा नम्बर ७ का अध्यक्ष राकेश कुमार साह तथा प्राथमिक स्वास्थ्य केन्द्रका कार्यालय प्रमुख सजन लाल साह सदस्य सचिब रहँदा राजस्व सम्बन्धी अनलाइन बिलिङ बिपरित गरिएको गैर कानुनी निर्णय समितिले के कुन कारणले गरेको हो ?’ प्रमुख प्रशासकीय अधिकृत बिनय सोनुले दिएको जवाफी पत्रमा भनिएको छ, ‘समितिको संरक्षक नगर प्रमुखले यो विषयमा समस्या समाधानको लागि आवश्यक पहल गर्न यस कार्यालयमा कुनै किसिमको जानकारी वा निर्देशन किन नदिएको हो ?’ भनी जिज्ञासा राखिएको छ ।
स्पष्टिकरण मार्फत जानकारी पाए पश्चात सम्बन्धित संलग्न सबै पक्षलाई नियमानुसार आवश्यक कारवाहीको लागि सबै निकायमा प्रक्रिया अगाडी बढाउने व्यहोरा सोनुले उल्लेख गरेका छन् ।
