दिपेश जोशी
राजविराज । नेपाली कांग्रेस मधेश प्रदेशका उपाध्यक्ष बिरेन्द्र सिंहले पार्टीका असल कार्यकर्ताहरु निराश भएको बताएका छन् ।
राजविराजस्थित सप्तरी कांग्रेस पार्टी कार्यालयमा आईतबार नेता/कार्यकर्तासँग भेट गर्दै सिंहले यस्तो बताएका हुन् ।
देशकै सबैभन्दा पुरानो र ठूलो पार्टीमा व्यक्तिवादी चरित्र, नातावाद कृपावाद र आर्थिक चलखेल भएको उनले बताए ।
‘गुट उपगुट पनि हाबी भयो, कांग्रेसको असल कार्यकर्ताको पहिचान भएन’ उनले भने, ‘बाहुबली प्रबृत्ति हाबी भयो । चम्चा बेल्चा हरेकतिर हाबी भयो । असली कार्यकर्ता निराश भए । यी कारणहरुले पार्टी कमजोर भयो ।’
विगतमा नेताको आसेपासेलाई बजेट दिइने, राजनीतिक नियुक्ति गरिदिने खेल भएको भन्दै उनले भने, ‘कि त आसेपासेलाई मौका मिल्यो या त आर्थिक चलखेल भयो । जसका कारण पार्टी कमजोर भयो ।’
यस्ता प्रबृत्तिले कांग्रेस कमजोर भएकै कारण देशको अवस्था बिग्रिएको बताउँदै उनले निराश भएका कार्यकर्तालाई आशा जगाउनुपर्ने आवश्यक्ता रहेको बताए ।
पार्टीभित्रको विकृति विसंगति चिरेर महामानव बीपी कोइरालाको सिद्धान्त अनुसार चल्नुपर्नेमा जोड दिदैं उनले १५औं महाधिवेसन सबै मिलेर सफल बनाउनुपर्ने बताए ।
