राजविराज । जन्मिएको शिशुलाई एक घण्टाभित्रै स्तनपान गराउनुपर्छ । कम्तीमा दुई बर्षसम्म स्तनपान गराइए शिशु र आमा दुबै स्वस्थ्य रहन्छन् । तर, सप्तरीसहित मधेश प्रदेशमा स्तनपान गराउने क्रम घटदै गएको छ ।
समाज जति शिक्षित बन्दै गएपनि स्तनपान गराउने क्रम घटदै गएको हो । राजविराजमा शुक्रबार आयोजित एक कार्यक्रममा स्तनपानको निराशाजनक तथ्यांक प्रस्तुत गरिएको छ ।
विश्व स्तनपान सप्ताहको समापन समारोहमा आयोजित सरोकारबालासँग अभिमुखिकरण कार्यक्रममा मधेश प्रदेशमा जन्मेको एक घण्टाभित्र ५४ दशमलव ८ प्रतिशत शिशुलाई मात्रै स्तनपान गराउने गरिएको जानकारी दिइयो ।
कार्यक्रममा जिल्ला स्वास्थ्य कार्यालय सप्तरीका प्रमुख डा. सतिश कुमार यादवले ६ महिनासम्म पूर्ण स्तनपान ६५ प्रतिशतले मात्रै गराइरहेको जानकारी दिए ।
दुई बर्षसम्म ९० दशमलव ८ प्रतिशतले स्तनपान गराइरहेको डा. यादवले बताए ।
उनका अनुसार स्तनपानभन्दा पनि दूधदानीबाट शिशुलाई दूध खुवाउने क्रम बढ्दो छ ।
‘दिगो जीवनको स्वस्थ्य सुरूवात : प्रभावकारी स्तनपानको लागि सबैको साथ’ आयोजना गरिएको सप्ताह समापनमा कार्यक्रमको उदेश्यबारे जानकारी गराउँदै स्वास्थ्य कार्यालय सप्तरीका प्रमुख डा. यादवले सफल स्तनपान अभ्यासहरुको आदानप्रदान र विस्तारलाई प्रोत्साहित गर्नुपर्ने बताए ।
शिशु एवं आमाको स्वास्थ्य र पोषण सुधारका लागि स्तनपानलाई प्रभावकारी रुपमा प्रवद्र्धन गर्नुपर्नेमा जोड दिदै उनले स्तनपान मैत्री नीति, कार्यक्रम तथा सेवालाई सुदृढ बनाउनु आवश्यक भएको बताए ।
स्तनपान शिशुको सम्पूर्ण आहार र पहिलो खोप भएको बताउँदै यादवले स्तनपानले आमालाई पनि स्वस्थ्य राख्ने भएकाले जन्मेको ६ महिनासम्म कुनै खानेकुरा नदिई शिशुलाई स्तनपान गराउनुपर्नेमा जोड दिए ।
कार्यक्रममा बहुक्षेत्रीय पोषण योजनाको बारेमा हेलन केयर इन्टरनेशनलका सावन यादवले जानकारी गराए भने स्तनपान तथा प्रजनन अधिकार सम्बन्धी एन कानुनको विषयमा जनस्वास्थ्य अधिकृत जागेश्वर खड्गाले जानकारी गराएका थिए ।
हेलन केयर इन्टरनेशनलको सहयोग हर्ड नेपालको साझेदारीमा जिल्ला जनस्वास्थ्य कार्यालयले अभिमुखिकरण कार्यक्रमको आयोजना गरेको हो ।
जिल्ला समन्वय समितिका प्रमुख शिबनारायण साहको प्रमुख आतिथ्यमा आयोजित कार्यक्रममा सरोकारबाला संघ–संस्थाका प्रतिनिधीको सहभागिता रहेको थियो ।
