राजविराज । बिहेमा नृत्य गर्ने किशोरीको हत्या आरोपमा सप्तरीबाट एक युवक पक्राउ परेका छन् ।
११ मंसिर २०८२ मा डिजेबाजामा ट्याक्टर गाडीमा नृत्य गरिरहेको अवस्थामा स्थानीय खुश्बु पालको हत्या गरेको भन्दै ती युवकलाई पक्राउ गरिएको प्रहरीले जनाएको छ ।
पक्राउ पर्नेमा बोदे बर्साइन नगरपालिका वडा नम्बर १ महनौरी टोल बस्ने गोबिन्दा भनिने गजेन्द्रनारायण यादव छन् ।
यादवले ट्याक्टर गाडीमा बिहेको अवसरमा नृत्य गरिरहेकी १४ वर्षीया खुश्बुलाई जिस्काउने क्रममा यादवले गाडीमै धकेलीदिएका थिए ।
त्यस क्रममा खुश्बुको टाउको चालु अवस्थामा रहेको जेनेरेटरमा ठोकिदा उनको कपाल जेनेरेटरमा वेरिन गई टाउको फुटी रगताम्य भएकी थिइन् ।
सख्त घाईते भएको अवस्थामा तत्काल घाईते खुश्बुलाई उपचारको लागि राजविराज स्थित गजेन्द्र नारायण सिंह अस्पताल राजविराजबाट विराटनगर स्थित न्यूरो अस्पताल हुँदै थप उपचारको लागि किर्तीपुर अस्पताल काठमाडौं लगिएको थियो ।
किर्तीपुरमा उपचार गराई रहेकोमा खुश्बुको स्वास्थ्य अवस्थामा केही सुधार हुँदा मिति २०८२/०९/०४ गतेका दिन चिकित्सकले डिस्चार्ज गरि दिएका थिए ।
उनलाई घर तर्फ ल्याउँदै गर्दाको क्रममा स्वास्थ्यमा समस्या हुँदा प्रादेशिक अस्पताल लहान सिरहामा लग्दा खुश्वुको मृत्यु भएको थियो ।
उक्त घटना पश्चात फरार रहेका यादवलाई खोजतलास गर्ने क्रममा हिजो मंगलबार बोदेबर्साइन नगरपालिका वडा नं.०१ बाट पक्राउ गरिएको सप्तरी प्रहरीका प्रवक्ता एवं डीएसपी हेमराज घिमिरेले इग्रीन मधेशलाई जानकारी दिए ।
मृतकका दाजु सुरज कुमार पालको जाहेरीले यादवलाई पक्राउ गरी सप्तरी जिल्ला अदालतबाट तीन दिनको म्याद लिएर ज्यान सम्बन्धी कसुरमा अनुसन्धान गरिरहेको प्रहरीले जनाएको छ ।
