दिपेश जोशी
राजविराज । सप्तरीको तिलाठी कोइलाडी गाउँपालिका वडा नम्बर ४ की कपुरदेवी साहको आँखा रसाइरहेको छ । उनको आँखाबाट बलिन्द्र आँशु झरिरहेको छ । यद्यपी यो आँशु भने खुशीको हो ।
रसुवा बाढीमा परी १० दिनसम्म सुरुङमा फँसेका उनका छोरा सञ्जय साह सकुशल घर आएपछि कपुरदेवीले छोरासँग अंकमाल गर्दै खुशीको आँशु निकालेकी हुन् ।
गत १० भदौमा आएको विध्वंश बाढीपछि सञ्जयको अवस्था अज्ञात थियो । १९ भदौ जनमाष्टमीको बिहान सञ्जयको सकुशल उद्धार गरिएको थियो । उद्धार गरी उनलाई काठमाडौंमा उपचार गराइएको थियो ।
उपचारपछि सञ्जय शनिबार राति घर फर्किएका छन् । सदरमुकाम राजविराजस्थित घरमा उनलाई परिवारजनले भव्य स्वागत गरे । घरका महिला सदस्यले अक्षता छर्केर, दीप बाली घर भित्र्याए ।
उनी सकुशल फर्किएकोमा एकले अर्कालाई मिठाई बाँडेका छन् भने केक काटेर खुशियाली मनाएका छन् ।
राजविराजबाट बिहानै उनी तिलाठी कोइलाडी गाउँपालिका ४ स्थित आफ्नो पुर्ख्यौली घर पुग्दा गाउँलेहरुको भींड नै लाग्यो ।
सञ्जय घर फर्किएपछि उनकी आमाको आँखाबाट लगातार आँशु बगिरहेको थियो । छोरासँग अँगालो हाल्दै उनले आँशु बगाइरहिन् ।
उनले यो खुशीको आँशु भएको बताउँदै भनिन्, ‘योभन्दा ठूलो खुशी मेरो लागि केही होइन् ।’
सञ्जयका पिता रामफल साह पनि औधी खुशी देखिएका छन् । उनले आफ्ना छोराको सकुशल उद्धार गरेकोमा सबैलाई धन्यवाद दिएका छन् ।
सञ्जयले नयाँ जीवन पाएपछि उनकी पत्नी लक्ष्मी पनि असाध्यै खुशी भएकी छन् । ‘मेरी छोरीका बाबा फर्किन्छन् भन्ने विश्वास हामीलाई थियो, भगवानले त्यो जुराइदियो ।’
त्रिशुली ३ ए जलविद्युत आयोजनाको सुरुङभित्रबाट उद्धार गरिएका सञ्जय साह भने आफूजस्तै अन्य साथीहरुको पनि उद्धार हुनुपर्ने बताउँछन् ।
जीवितै उद्धार गरिएपछि अहिले सञ्जयको घरमा खुशीयाली छाएको छ । बाढीमा परी वेपत्ता भएका अन्य व्यक्तिहरुको पनि सरकारले चाँडै उद्धार गरोस् र उनीहरुको घरमा पनि यस्तै खुशीयाली छाओस् । यसतर्फ सरकार गम्भीर बन्नु जरुरी छ ।
