राजविराज । नेपाल उद्योग वाणिज्य महासंघका वरिष्ठ उपाध्यक्ष सुरकृष्ण बैद्यले नेपालमा व्यवसाय चलायमान बनाउन सीमामा कडाई अपरिहार्य रहेको बताएका छन् ।
सप्तरी उद्योग वाणिज्य संघको १२ औं साधारण सभालाई शनिबार उद्घाटन गर्दै उनले यस्तो बताएका हुन् । उनले जहाँ जहाँको सीमामा कडाई गरिएको छ, त्यहाँका व्यवसाय राम्रो भएको बताए ।
सीमा कडाई नभएको ठाउँका व्यापारी एकदमै पीडित बन्दै गएको बताउँदै उनले यसतर्फ राज्यको ध्यानाकर्षण गराए ।
उनले भने, ‘सीमा कडाई नहुँदा हाम्रो व्यवसाय घरबाट छाप्रो बन्दै गएको छ, उताका व्यवसाय छाप्रोबाट घर बन्दै गएको अवस्था छ ।’
राष्ट्र बैंकको नीतिले पनि व्यापारीहरु पीडित बनिरहेको उल्लेख गर्दै बैद्यले पुराना ऐन, कानुन परिवर्तन नगरिएसम्म नेपालका व्यापार, व्यवसाय अगाडि बढन नसक्ने बताए ।
सरकारले व्यवसायीको समस्या समाधान नगरेको उल्लेख गर्दै उनले अब हामीले पनि आवाज उठाउनु आवश्यक भएको बताए ।
