राजविराज । काठमाडौंबाट राजविराज चल्ने बसले यात्रुलाई दुःख दिएको पाइएको छ । काठमाडौंबाट राजविराज जाने भन्दै यात्रुलाई बसाएर बस परिवर्तन गरेपछि यात्रुलाई सास्ती खेप्नुपरेको हो ।
शुक्रबार साँझ काठमाडौंमा यात्रुलाई बसाएर राजविराज हिंडेको सिम्रिक यातायात नामक बसले अन्य बसमा यात्रुलाई बसाएका छन् । अरु बसमा बसाउँदा तोकिएको सिट नपाएर यात्रुलाई कष्ट भोग्नुपरेको छ ।
सिम्रिक यातायातको बा.प्र–१–ख–७१७७ नम्बरको बसमा राजविराज आउने यात्रुहरु ललितपुरको बालकुमारी, काठमाडौंको कोटेश्वर, गौशालासहितका ठाउँमा चढेका थिए । यात्रुलाई बसाएर हिंडेको उक्त बस कलंकी पुगेपछि जनकपुरको बसमा बसाएको कष्टका साथ राजविराज आएका एक यात्रुले बताएका छन् ।
‘मैले ए साइडको झयालनिरको ‘क’ सिट बुक गराएर गाडीमा चढेको थिएँ’ ती यात्रुले भने, ‘तर कलंकीमा ओरालेर अन्य बसमा बसाउँदा कष्टका साथ यात्रा गर्नुपरेको छ ।’
टिकट बुक भएको गाडीबाट ओराल्दा केही बेर कलंकीमा बसका कर्मचारीसँग बादविवाद पनि भएको र कर्मचारीले राम्रो सिटमा बसाएर राजविराजसम्मै पुर्याइदिने आश्वासन राजविराजका यात्रुलाई दिएका थिए ।
तर, जनकपुरका यात्रु बसेको बसमा केबिन र पछाडिको सिटमा बसाएर ढल्केबरसम्म ल्याएको यात्रुहरुको भनाई छ । आज बिहान ढल्केबर पुर्याउँदा बस कर्मचारीले एउटा माइक्रोमा बसाइदिएको र बिहान ११ बजेतिर राजविराज पुर्याएको यात्रुको भनाई छ ।
‘लग्ने मन नै थिएन भने किन टिकट बुकिङ्ग गर्नुपर्यो ?’ कष्टका साथ राजविराज आएका यात्रुले भने, ‘काठमाडौंदेखि राजविराजसम्मको लामो दूरीको यात्रा सिम्रिक बसका कारण सास्तीका साथ पूरा गर्नुपर्यो ।’
सिम्रिक यातायात प्रालिका मधेश प्रदेश इन्चार्ज अभिनय सिंहले बसका कर्मचारीको कुनै दोष नरहेको बताए । उनले टिकट बुकिङ्ग गर्ने व्यक्तिहरुको लापर्वाहीका कारण यात्रुलाई सास्ती खेप्नुपरेको बताए ।
बुकिङ्गकै कारण यात्रुहरुलाई समस्या खेप्नुपरेकोमा दुःख व्यक्त गर्दै उनले गल्ती गर्ने बुकिङ्गहरुलाई हटाइसकिएको बताए ।
