राजविराज । सामाजिक सञ्जालमा उत्तेजिक भिडियो तथा भ्रामक सूचना सम्प्रेषण गर्नेमाथि सप्तरी प्रशासनले निगरानी बढाएको छ ।
जिल्ला प्रशासन कार्यालयले शाखा अधिकृत सन्तोष रायको संयोजकत्वमा ज्वाइन्ट अपरेशन सेल गठन गरी यस्ता गतिविभी गर्नेमाथि निगरानी बढाएको छ ।
निगरानी गर्ने क्रममा सामाजिक सञ्जालमा उत्तेजित सामग्री पोष्ट गर्ने तीन जनालाई नियन्त्रणमा लिएको छ । पक्राउ परेका मध्ये दुई जनालाई सम्झाई बुझाई छाडिएको जिल्ला प्रशासन कार्यालयले जनाएको छ ।
पक्राउ परेका तिरहु गाउँपालिकाको वडा नम्बर ४ डिमन बस्ने २३ बर्षीय जफिर मियाँ र रुपनी गाउँपालिका वडा नम्बर १ बस्ने ३९ बर्षीय मुकेश यादवलाई सम्झाई बुझाई छाडिएको छ ।
यस्तै, राजविराज नगरपालिका ६ बस्ने २० बर्षीय छोटु कुमार मेस्तरलाई आवश्यक अनुसन्धानका लागि नियन्त्रणमा लिएर जिल्ला प्रहरी कार्यालयमा राखिएको प्रशासन कार्यालयले जनाएको छ ।
कार्यालयका अनुसार सामाजिक सञ्जालमा उत्तेजित सामग्री पोष्ट गर्ने १० जना भेटिएका छन् ।
छिन्नमस्ता गाउँपालिका वडा नम्बर ३ का आनन्द चौधरी, हनुमाननगर कंकालिनी नगरपालिका १४ का रामकुमार महतो, राजविराज नगरपालिका ६ का २८ बर्षीय विशाल चौधरी, राजविराज २ स्थित राजदेवी ड्राइभिङ सेन्टरका सञ्चालक ३५ बर्षीय आशिष यादव, सुरुङा नगरपालिका १० कदमाहाका दिनेश कुमार यादव छन् ।
उनीहरुले पोष्ट गरेको सामग्री हटाउन लगाइएको जिल्ला प्रशासन कार्यालयले जनाएको छ ।
त्यस्तै, विदेशमा रहेका व्यक्तिहरु पनि उत्तेजित सामग्री पोष्ट गर्ने गरेको पाइएको छ ।
राजविराज नगरपालिका ७ घर भई टर्कीमा रहेका सिनु साह र सुनसरीको हरिनगर गाउँपालिका ६ घर भई कतारमा रहेका २८ बर्षीय असिम अन्सारी पनि उत्तेजित सामग्री पोष्ट गरेको पाइएको छ ।
