राजविराज । सप्तरी जिल्ला बार एकाईमा विशेष साधारण सभा हुने भएको छ ।
बारका पूर्व अध्यक्षसहित सदस्यहरुले निवेदन मार्फत् विशेष साधारण सभाको माग गरेका थिए । गत १९ असोजमा दिएको निवेदनको आधारमा एकाईले विशेष साधारण सभा गर्न लागेको हो ।
आगामी मंसिर ११ गते शुक्रबारका दिन दिउँसो १ बजेका लागि विशेष साधारण सभा तोकिएको छ । जिल्ला बारको भवनमा विशेष साधारण सभा हुने बारका उपाध्यक्ष मिस्टर चौधरी र सचिव राम एकबाल मण्डलले एक पत्र मार्फत् बताएका छन् ।
दुबैले हस्ताक्षर गरेको पत्रमा मंसिर ११ गतेको विशेष साधारण सभामा सहभागी हुन जिल्ला बारका सम्पूर्ण कानुन व्यवसायीलाई यसै सूचना मार्फत जानकारी गराइएको उल्लेख छ ।
उपाध्यक्ष मिस्टर चौधरीले भने दबाबमा आएर यस्तो सूचना निकाल्नुपरेको प्रतिकृया दिएका छन् । ‘केहि कानुन व्यवसायी आएर दबाद दिन थाले’ इग्रीन मधेशसँग उनले भने, ‘त्यहीं दबाबकाबीचमा यो सूचना निकालिएको छ ।’
सूचना निकालिएपनि कार्यसमितिमा यसबारे छलफल हुने उनले बताए ।
सप्तरी जिल्ला बारमा लामो समयदेखि विवाद रहँदै आएको छ । पूर्व अध्यक्षसहितका सदस्यहरुले बर्तमान पदाधिकारीले अनियमितता भएको भन्दै आएका छन् ।
बर्तमान पदाधिकारीले कुनै किसिमको अनियमितता नगरेको र उनीहरुले बलजफ्ती गर्दै आएको बताएका छन् । बर्तमान कार्यसमितिको समयावधी पनि सकिसकिएको छ । ९ कात्तिकदेखि नै यो कार्यसमितिको पदावधी सकिसकिएको हो ।
